Read O‘zbek tilidagi Muqaddas Kitob, 2013 Zabur 49 Bible Online

Zabur 49 - O‘zbek tilidagi Muqaddas Kitob, 2013 bible

Zabur 49

¹Osifning [1] sanosi. [1] Xudolar Xudosi — Egamiz So‘ylar, da’vat qilar yer yuziga Sharqdan g‘arbga qadar.

²Xudo O‘z nurini sochar Quddusdan [2] — Go‘zallikda komil shahardan.

³Xudoyimiz kelar, sukut saqlamas, Uning oldida alanga yamlab yuborar, Atrofida bo‘ron g‘azabdan quturar.

⁴O‘z xalqini hukm etmoq uchun Yeru osmonni guvoh qilib chaqirar:

⁵“Yig‘ib keling Mening taqvodor xalqimni, Qurbonlik orqali Men bilan ahd qilganlarni!”

⁶Samolar e’lon qilar Xudoning odilligini, Hakam Xudoning O‘zidir.

⁷Xudo aytar: “Eshit, ey xalqim, Men so‘zlayman, Ey Isroil, senga qarshi guvohlik beraman, Men Xudoman, sening Xudoyingman.

⁸Keltirgan qurbonliklaring doimo oldimda. Kuydirilgan qurbonliklaringdan shikoyat qilmayman.

⁹Og‘ilingdagi buqangga muhtoj emasman, Suruvingdagi echkingga ham zor emasman.

¹⁰Menikidir o‘rmondagi jamiki hayvon, Minglab qirlardagi molu qo‘ylar.

¹¹Menikidir jamiki tog‘dagi qushlar, Menikidir daladagi barcha jonivorlar.

¹²Och qolsam ham, so‘ramasdim sizlardan, Menikidir olam, undagi hamma narsa.

¹³Men buqa go‘shtini yeymanmi?! Yoki echki qonini ichamanmi?!

¹⁴Men, Xudoga, shukrona qurbonligi qil, Men, Xudoyi Taologa, ontingni ado qil.

¹⁵Og‘ir kunda Menga iltijo qilgin, Senga najot beraman, Sen esa Menga maqtov aytasan.”

¹⁶Fosiqqa esa Xudo shunday deydi: “Ne haqing bor qonunlarimni tilga olmoqqa?! Ne haqing bor ahdimni og‘zingga olmoqqa?!

¹⁷Nafrat ila qaraysan–ku yo‘l–yo‘riqlarimga, Otib tashlaysan–ku kalomlarimni orqangga!

¹⁸O‘g‘rini ko‘rganingda, do‘stlashasan u bilan, Sherik bo‘lib olasan zinokorlar bilan.

¹⁹Og‘zing yomon so‘zlar uchun doim tayyordir, Tilingning to‘qigani faqat yolg‘ondir.

²⁰O‘tirib, birodaringga qarshi so‘ylaysan, Tug‘ishganingga ham tuhmat qilasan.

²¹Shu ishlarni qilganingda, sukut saqlardim, Meni ham o‘zingga o‘xshagan, deb o‘ylading. Endi–chi, aybingni bo‘yningga qo‘yib, Seni hukm qilaman.

²²Ey Meni unutganlar, bilib qo‘ying, Yo‘qsa sizlarni parcha–parcha qilaman, Bironta najot berguvchi topilmaydi.

²³Menga shukrona qurbonligi keltirganlar Meni izzat qilgan bo‘ladi. Men O‘z najotimni To‘g‘ri yo‘ldan yurganlarga ko‘rsataman.”