Read O‘zbek tilidagi Muqaddas Kitob, 2013 Zabur 50 Bible Online

Zabur 50 - O‘zbek tilidagi Muqaddas Kitob, 2013 bible

Zabur 50

¹[1-2] Ijrochilar rahbariga. Dovud Botshevaning oldiga kirgandan so‘ng, Natan payg‘ambar uning oldiga kelganda [1], Dovudning aytgan sanosi.

³Rahm qilgin menga, ey Xudo, Sodiq sevging, cheksiz shafqating ila Itoatsizligimni olib tashlagin.

⁴Yuvib tashla barcha ayblarimni, Poklagin gunohlarimdan.

⁵Ha, o‘zimning itoatsizligimni bilaman, Gunohim turar ko‘z o‘ngimda mudom.

⁶Senga, yolg‘iz Senga qarshi gunoh qilganman, Sening oldingda qabihliklar qilganman, Shu bois hukm qilganingda Sen barhaqsan, Qoralaganingda doimo to‘g‘ri bo‘lib chiqasan.

⁷Mana, gunohkor bo‘lib tug‘ilganman, Onam qornidayoq gunohkor edim.

⁸Ha, inson yuragida Sen istaysan haqiqatni, Qalbimning to‘rida o‘rgatgin [2] donolikni.

⁹Pokla meni issop o‘ti [3] ila, toza bo‘layin, Yuvgin meni, qordan ham oq bo‘layin.

¹⁰Yana eshitay shodlik, quvonch xabarin, Sen ezgan suyaklarim yana quvonsin.

¹¹Gunohlarimdan chetga ol ko‘zlaringni, Olib tashla ayblarimni.

¹²Ey Xudo, menda toza yurak yaratgin, Ichimda to‘g‘ri ruhni yangilagin.

¹³Huzuringdan meni uloqtirib tashlama, Muqaddas Ruhingni mendan olma.

¹⁴Najoting shodligini menga qaytargin, Itoat etishga menda istak uyg‘otgin.

¹⁵Shunda itoatsizlarga Sening yo‘llaringni o‘rgataman, Gunohkorlar qaytib keladilar Senga.

¹⁶Qon to‘kkanim uchun kechir meni, ey Xudo, Najot berganingni sevinch ila kuylar tilim, Ey najotkorim Xudo!

¹⁷Lablarimni ochgin, ey Rabbiy, Og‘zim Seni madh aylasin.

¹⁸Qurbonlikni Sen xohlamaysan, Qurbonlik kuydirganimda ham Sen xush ko‘rmagan bo‘larding.

¹⁹Senga ma’qul qurbonligim ezilgan ruhdir, Ezilgan, tavba qilgan yurakni Sen rad etmaysan, ey Xudo.

²⁰Lutfu karaming bilan Quddusni yashnatgin, Sion shahri devorlarini qaytadan qurgin.

²¹Shunda munosib qurbonliklar keltiriladi, Kuydiriladigan qurbonliklar Seni mamnun qiladi, Qurbongohingda buqalar nazr qilinadi.