Read O‘zbek tilidagi Muqaddas Kitob, 2013 Zabur 54 Bible Online

Zabur 54 - O‘zbek tilidagi Muqaddas Kitob, 2013 bible

Zabur 54

¹Ijrochilar rahbariga. Torli asboblar jo‘rligida. Dovud qasidasi.

²Ibodatimga quloq sol, ey Xudo, Iltijoimni e’tiborsiz qoldirma.

³[3-4] Eshit meni, javob ber, Dushmanlarim dag‘dag‘asi, fosiqlarning siquvi Boshimga g‘am–kulfat keltiradi. Ular g‘azablanib, mendan nafratlanadi. Eh, o‘ylarim qiynar meni, Boshimdan uchgan aqlim.

⁵Yuragim hasratga to‘ladir, O‘lim vahimasi meni bosib keladir.

⁶Qo‘rquv, titroq menga kelmoqda, Dahshat meni ezib bormoqda.

⁷“Qaniydi kaptar kabi qanotim bo‘lsa”, dedim, “Uchib ketib, orom olgan bo‘lardim.

⁸Haqiqatan, uzoqlarga uchib qutulardim, Sahroda makon qilgan bo‘lardim.

⁹Quturgan shamolu bo‘rondan qochib, O‘zimga boshpana topgani shoshilgan bo‘lardim.”

¹⁰Ey Rabbiy, ularni chalg‘it, Ularning gaplarini chalkashtir. Shaharda zo‘ravonlik, janjalni ko‘rib turibman.

¹¹Ular kecha–kunduz shahar devori ustida izg‘iydi, Yovuzlik, vahima shahar ichida yuz bermoqda.

¹²Shaharning o‘rtasida buzg‘unchilik, Ko‘chalaridan zulm va hiyla arimaydi.

¹³G‘animlarim meni haqorat qilganda edi, Bunga bardoshim yetgan bo‘lardi. Dushmanim o‘zini mendan yuqori qo‘yganda edi, Undan yashiringan bo‘lardim.

¹⁴Ammo u mening tengim–ku, Yaqin do‘stim hamda hamrohim–ku.

¹⁵U bilan dilkash do‘st edik, Ey Xudo, Sening uyingdagi yig‘inda birga yurardik.

¹⁶Uylari, yuraklari fosiqlikka to‘la bo‘lgani uchun G‘animlarim o‘limga ro‘baro‘ bo‘lsin, Tiriklayin o‘liklar diyoriga [1] tushsin.

¹⁷Men iltijo qilaman Xudoga, Najot beradi Egam menga.

¹⁸Oqshom, sahar hamda kunduz Dardu fig‘onlarimni aytaman. Egam mening ovozimni eshitadi.

¹⁹Garchi menga qarshilar ko‘p bo‘lsa ham, Birorta ham zarar yetkazmay Meni janglardan qutqaradi.

²⁰Azaldan taxtda o‘tirgan Xudo Menga quloq tutib, Yo‘llarini o‘zgartirmagani uchun, Xudodan qo‘rqmaganlari uchun Dushmanlarimni mag‘lub qiladi.

²¹Hamrohim o‘z do‘stiga qarshi qo‘lini ko‘tardi, Men bilan qilgan ahdiga u xiyonat qildi.

²²Uning og‘zidan bol tomadi, Yuragi esa adovatga to‘la. So‘zlari moydan ham yoqimli, Aslida qindan chiqqan qilichdaydir.

²³Tashvishlaringni Egamizga topshirgin, U senga tayanch bo‘ladi. Egamiz hech qachon solihning yiqilishiga yo‘l qo‘ymaydi.

²⁴Ey Xudo, fosiqlarni Sen O‘liklar diyoriga uloqtirasan. Qonxo‘r, xoin kimsalar aslo Umrining yarmisini ham yashamaydi. Men esa Senga umid bog‘layman.