Read O‘zbek tilidagi Muqaddas Kitob, 2013 Zabur 57 Bible Online

Zabur 57 - O‘zbek tilidagi Muqaddas Kitob, 2013 bible

Zabur 57

¹Ijrochilar rahbariga. “Xarob etma” kuyiga aytilgan. Dovud qo‘shig‘i.

²Ey hukmdorlar! Nahot siz adolatli qaror chiqarasiz?! Nahot sizlar to‘g‘rilik ila xalqlarni hukm qilasiz?!

³Yo‘q, axir, yuraklaringiz adolatsizlikka to‘la–ku! Yer yuzida qo‘llaringiz zo‘ravonlikni taqsimlaydi–ku!

⁴Fosiqlar onasining qornidayoq adashadi, Yolg‘onchilar tug‘ilishdanoq yo‘ldan ozadi.

⁵Ularning zahri ilonning zahriga o‘xshaydi, Kar ilonga o‘xshab quloqlarini berkitadi.

⁶Ilon o‘ynatuvchilar kuyini eshitmaydi, Mohir afsungarni aslo eshitmaydi.

⁷Sindir ularning tishlarini, ey Xudo, Sug‘urib ol shervachchalarning qoziq tishlarini, ey Egam!

⁸Ular oqar suvday yo‘q bo‘lib ketsin, Ularning o‘qlari nishonga tegmaydigan bo‘lsin.

⁹Balchiqqa botib ketgan shilliq qurtday bo‘lsin, Onasi qornidan o‘lik tug‘ilib, Hech qachon quyosh ko‘rmagan chaqaloqday bo‘lsin.

¹⁰Yonayotgan tikan qozonni tez qizdirganday Fosiqni shunchalik tez supurib yo‘q qilgin.

¹¹Fosiqdan o‘ch olinganda, solih sevinadi, Ularning qonida solih oyoqlarini yuvadi.

¹²Odamlar aytar: “Shubhasiz, solihga mukofot bordir, Yer yuzida hukm qiluvchi Xudo albatta bordir.”