Read O‘zbek tilidagi Muqaddas Kitob, 2013 Zabur 58 Bible Online

Zabur 58 - O‘zbek tilidagi Muqaddas Kitob, 2013 bible

Zabur 58

¹Ijrochilar rahbariga. “Xarob etma” kuyiga aytilgan. Shoul Dovudni o‘ldirish uchun uning hovlisini poylashga kishi yuborganda [1], Dovudning aytgan qo‘shig‘i.

²G‘animlarimdan meni qutqar, ey Xudoyim, Menga qarshi turganlardan himoya qil meni.

³Badkirdorlardan qutqargin meni, Qonxo‘rlardan saqlagin meni.

⁴Qara, ular meni poylab yotarlar, Zolimlar menga qarshi fitna qilarlar, Garchi aybu gunohim bo‘lmasa–da, ey Egam,

⁵Garchi men haqsizlik qilmasam–da, Ular menga qarshi hujum qilmoqqa tayyor. Qo‘zg‘al O‘zing, ahvolimni ko‘r, kel yordamga.

⁶Ey Isroil xalqining Xudosi, Ey Parvardigori Olam — Egam, Qani, bo‘l, barcha xalqlarni jazolagin, Yovuz sotqinlarga shafqat qilmagin.

⁷G‘animlarim har kun oqshomda qaytib keladi, Itlarday uvullab, shahar izg‘iydi.

⁸Qara, og‘izlaridan qusuq chiqadi, Tillaridan zahar so‘zlar chiqadi, “Kim ham bizni eshitardi”, deya o‘ylaydi.

⁹Ular ustidan Sen kulasan, ey Egam, Hamma xalqlarni Sen masxaralaysan.

¹⁰Senga intizorman, ey Qudratim, Sen mening qal’amsan, ey Xudo!

¹¹Sodiq sevging ila, ey Xudoyim, menga madad berasan, Ko‘zlarimga dushmanlarim mag‘lubiyatini ko‘rsatasan.

¹²Ularni o‘ldirma, xalqim bu saboqni unutib qo‘yar, Qudrating bilan ularni titrat, Ey qalqonim Rabbiy, ularni ko‘tarib ur.

¹³Ularning og‘zidan chiqqan gunohlar uchun, Lablaridan chiqqan so‘zlar uchun O‘zlarining takabburligi orqali ilinsin. Ular aytadigan la’nat, yolg‘on uchun

¹⁴G‘azabing ila ularni yo‘q qilgin, Bitta ham qoldirmay qirib tashlagin. Shunda ey Xudo, Yoqub nasli ustidan hukmron ekanliging Yerning to‘rt tomonida ma’lum bo‘ladi.

¹⁵G‘animlarim har kun oqshomda qaytib keladi, Itlarday uvullab, shahar izg‘iydi.

¹⁶Ovqat izlab daydib yuradi, Agar to‘ymasalar, irillaydi.

¹⁷Men esa Sening qudratingni tarannum etaman, Sodiq sevgingni tongda sevinch ila kuylayman. Sen mening qal’am bo‘lgansan, Kulfatda qolganimda panohimsan.

¹⁸Ey Qudratim, Seni kuylab madh qilaman, Sen, ey Xudo, mening qal’amsan, Sodiq sevgisini ko‘rsatuvchi Xudosan.