Read O‘zbek tilidagi Muqaddas Kitob, 2013 Zabur 59 Bible Online

Zabur 59 - O‘zbek tilidagi Muqaddas Kitob, 2013 bible

Zabur 59

¹[1-2] Ijrochilar rahbariga. “Nilufar gul shahodati” kuyiga aytilgan. Ta’lim uchun. Dovud Oram–Naxrayim [1] va Oram–Zo‘vo [2] xalqi bilan jang qilgandan keyin [3] Yo‘ab qaytib kelib, o‘n ikki ming edomlikni Tuz vodiysida [4] o‘ldirganda, Dovudning aytgan qo‘shig‘i.

³Ey Xudo, bizni tark etding, Mudofaamizni yorib o‘tding, Bizdan g‘azablanding, Endi bizni oldingi holimizga qaytargin!

⁴Yerni silkitding, yoriqlar ochding, Yoriqlarni tuzatgin, yer tebranmoqda.

⁵Xalqingga ko‘p azoblar berding, Kalovlanib yursin, deb ichgani sharob [5] berding.

⁶Ular kamon o‘qlaridan yashirinib olsin, deya [6] O‘zingdan qo‘rqqanlarga ishora berib, bayroq ko‘rsatasan.

⁷O‘ng qo‘ling ila g‘alaba ato qilgin, Bizga javob bergin [7], O‘zingning sevganlaring najot topsin.

⁸Ey Xudo, O‘z muqaddas makoningdan va’da bergansan [8]: “Shodlanib, Shakamni [9] bo‘lib tashlayman, Suxo‘t vodiysini [10] taqsimlab beraman.

⁹Gilad Menikidir, Manashe [11] Menikidir, Efrayim dubulg‘amdir, Yahudo [12] saltanat hassamdir.

¹⁰Mo‘ab Mening qo‘lyuvgichimdir, Edom uzra chorig‘imni otaman [13], Olqishla meni, ey Filistlar! [14]”

¹¹Eh, qaniydi mustahkam shaharga [15] meni olib borsalar, Edomga meni boshlab borsalar.

¹²Ey Xudo, axir, bizni O‘zing rad etding–ku! Lashkarimizga yo‘lboshchilik qilmayapsan–ku endi!

¹³Dushmandan qutqarib, bizga yordam ber, Insonning yordami butunlay behuda.

¹⁴Ey Xudo, Sen bilan biz g‘olib bo‘lamiz, Dushmanlarimizni Sen yanchib tashlaysan.