Read O‘zbek tilidagi Muqaddas Kitob, 2013 Zabur 60 Bible Online

Zabur 60 - O‘zbek tilidagi Muqaddas Kitob, 2013 bible

Zabur 60

¹Ijrochilar rahbariga. Torli asboblar jo‘rligida. Dovud sanosi.

²Eshitgin, ey Xudo, ohu nolamni, Tinglagin mening ibodatimni.

³Yerning u chetidan Senga yolvoraman, Yuragim qon bo‘lganda, Seni chaqiraman. Yetib bo‘lmas baland qoyaga meni olib chiqqin.

⁴Sen mening panohim bo‘lgandirsan, Dushmanimga qarshi mustahkam minorasan.

⁵Chodiringda to abad maskan qilay, Qanotlaring soyasida panoh topay.

⁶Axir, ey Xudo, ontimni eshitgansan, Nomingdan qo‘rqqanlarning mulkidan menga ato qilgansan.

⁷Shohning umrini uzaytirgin, Nasllar osha hayotini davom ettirgin.

⁸Ey Xudo, u to abad huzuringda taxtda o‘tirsin, Sodiq sevging, sadoqating ila uni himoya qilgin.

⁹Shunda senga har doim hamdu sano kuylayman, Bergan ontimni har kuni ado etaman.