Read O‘zbek tilidagi Muqaddas Kitob, 2013 Zabur 63 Bible Online

Zabur 63 - O‘zbek tilidagi Muqaddas Kitob, 2013 bible

Zabur 63

¹Ijrochilar rahbariga. Dovud sanosi.

²Ey Xudo, ovozimni eshitgin iltijo qilganimda, Hayotimni dushman vahimasidan qutqargin.

³Fosiqning fitnasidan meni yashirgin, Badkirdorlar to‘dasidan himoya qilgin.

⁴Ular tillarini shamshirday qayraydi, Nishonga olib, zaharli so‘zlarini o‘qday otadi.

⁵Aybsiz odamni pistirmadan turib otadi, Hech qo‘rqmay, birdaniga unga o‘q uzadi.

⁶Bir–birining qabih rejalarin qo‘llab–quvvatlaydi, Yashirincha tuzoq qo‘yishga til biriktiradi, “Buni kim ham ko‘rardi”, deb o‘ylaydi.

⁷Ular adolatsizlikni qasd qiladi: “Ajoyib reja tuzdik”, deb aytadi. Albatta inson fikri, yuragini bilib bo‘lmaydi.

⁸Xudo esa fosiqlarga o‘q uzadi, To‘satdan ular yaralanadi.

⁹Ularning tili o‘zlarining boshini yeydi, Ularni ko‘rganlar qaltirab ketadi.

¹⁰Jamiki odamzod qo‘rqib qoladi, Xudoning ishlarini ular e’lon qiladi, Xudoning qilganlari haqida o‘ylab ko‘radi.

¹¹Solihlar Egamiz tufayli sevinch topsin! Solihlar Unda panoh topsin, Hamma to‘g‘ri insonlar Uni madh etsin.