Read O‘zbek tilidagi Muqaddas Kitob, 2013 Zabur 64 Bible Online

Zabur 64 - O‘zbek tilidagi Muqaddas Kitob, 2013 bible

Zabur 64

¹Ijrochilar rahbariga. Dovud sanosi. Qo‘shiq.

²Ey Quddusdagi [1] Xudo, Sen loyiqsan hamdu sanoga, Senga bergan ontimizni bajo qilamiz.

³Sensan ibodatlarga javob berguvchi, Jamiki odamzod Senga keladi.

⁴Gunoh ustimizdan [2] tantana qilgan, Sen esa kechirasan gunohlarimizni [3].

⁵Qutlug‘ hovlimda yashasin, deya Sen O‘zing tanlab, Olib kelgan inson naqadar baxtli! Uyingning, muqaddas Ma’badingning Ne’matlaridan biz bahramand bo‘lamiz.

⁶G‘aroyib ishlar ko‘rsatib, G‘alaba ila bizga javob berasan, Ey najotkorimiz Xudo! Yerning to‘rt tomonining, Hamda eng uzoq dengizlarning umidi Sensan.

⁷Kuch bilan O‘zingni qurollantirgansan, Qudrating ila tog‘larni joylashtirgansan.

⁸Dengizlar hayqirig‘ini bostirasan, To‘lqinlar shovqinini tinchitasan. Xalqlar shovqin–suroniga barham berasan.

⁹Dunyoning u chetida yashovchilar Mo‘jizalaringdan qo‘rquvga tushadi. Sharqdan g‘arbgacha xalqlar Sening ishlaringni sevinch ila kuylaydi.

¹⁰Zaminni Sen sug‘orib parvarishlaysan, Mo‘l–ko‘l qilib uni boyitasan. Ey Xudo, daryolaring suvi limmo–limdir, Insonlarni don–dun bilan ta’minlashni mo‘ljallagansan.

¹¹Egatlarini qondirib sug‘orasan, Baland joylarini o‘zing tekislaysan, Yomg‘ir bilan tuprog‘ini yumshatasan, Hosiliga baraka berasan.

¹²Mo‘l hosil bilan yilga toj kiygizasan, Aravalaring yurgan yo‘llardan boylik oqadi.

¹³Cho‘l sersuv o‘tloqzorlarga aylanadi, Tepaliklar sevinchga burkanadi.

¹⁴Yaylovlar qo‘y suruvlari bilan qoplanadi, Vodiylar donlarga to‘ladi, Ular sevinchdan hayqirib qo‘shiq aytadi.