Read O‘zbek tilidagi Muqaddas Kitob, 2013 Zabur 65 Bible Online

Zabur 65 - O‘zbek tilidagi Muqaddas Kitob, 2013 bible

Zabur 65

¹Ijrochilar rahbariga. Sano. Qo‘shiq. [1] Xudoga shodlik ila hayqiring, Ey yer yuzidagi insonlar!

²Xudoning ulug‘vorligini kuylang! Unga ajoyib hamdu sanolar ayting!

³Xudoga aytinglar: “Sening ishlaring naqadar g‘aroyib! Qudrating buyukligidan Dushmanlaring oldingda g‘ujanak bo‘ladi.

⁴Butun zamin Senga sajda qiladi, Ular Senga hamdu sano aytadi, Ha, O‘zingga hamdu sano kuylaydi.”

⁵Kel! Xudo nima qilganini ko‘rgin! Inson manfaati uchun qilgan G‘aroyib ishlarini ko‘rgin!

⁶Dengizni quruq yerga aylantirdi, Ota–bobolarimiz suvlardan yurib o‘tdi [1], U yerda qilgan ishlaridan, Xudo tufayli biz sevinamiz.

⁷Qudrati ila to abad hukm suradi, Ko‘zlari xalqlarni kuzatib turadi, Unga qarshi isyonchilar qo‘zg‘almasin.

⁸Ey xalqlar, Xudoyimizga olqishlar ayting, Uning hamdu sanosi yangrasin.

⁹U bizning hayotimizni saqlagan, Oyoqlarimizni toyib ketishdan asragan.

¹⁰Ey Xudo, Sen bizni sinading, Kumushni tozalaganday bizni tozalading.

¹¹Bizni tuzoqqa yo‘liqtirding, Yelkamizga og‘ir yuk ortding.

¹²Aravalarni boshimiz uzra yurgizding, Olov, suvlardan biz kechib o‘tdik, Farovonlikka [2] bizni olib kelding.

¹³Kuydiriladigan qurbonliklar bilan Senga bergan ontimni ado etgani Men Sening uyingga kelaman.

¹⁴Kulfatda qolganimda ont ichgan edim, Tilim va’da bergan, og‘zim so‘ylagan edi.

¹⁵Bo‘rdoqilarni kuydirib, Senga qurbonlik qilaman. Qo‘chqor, taka, buqalarni keltiraman. Qurbonliklarning hidlari osmonga yetib boradi.

¹⁶Ey Xudodan qo‘rqqanlar, kelib, eshitinglar, Men uchun U nima qilganin so‘zlab berayin.

¹⁷Madad so‘rab Xudoga yolvordim, Uning hamdu sanosi hech tilimdan tushmadi.

¹⁸Yuragimda gunohim bo‘lsa edi, Meni aslo eshitmas edi Rabbiy.

¹⁹Xudo meni tingladi, Ibodat qilganimda, ovozimni eshitdi.

²⁰Xudoga olqishlar bo‘lsin! Ibodatimni U rad qilmadi, Sodiq sevgisini mendan darig‘ tutmadi.