Read O‘zbek tilidagi Muqaddas Kitob, 2013 Zabur 67 Bible Online

Zabur 67 - O‘zbek tilidagi Muqaddas Kitob, 2013 bible

Zabur 67

¹Ijrochilar rahbariga. Dovud sanosi. Qo‘shiq.

²Qo‘zg‘alsin Xudo, tarqalib ketsin dushmanlari, Oldidan qochib ketsin Undan nafratlanganlar.

³Tutunni shamol tarqatgani kabi Xudo ularni haydab yuborsin. Mum olovda erigani kabi Xudo oldida fosiq halok bo‘lsin.

⁴Solihlar esa xursand bo‘lsin, Xudo oldida shod bo‘lsin, Ular xursandlikka to‘lib–toshsin.

⁵Xudoga hamdu sanolar kuylang, Uning nomini tarannum eting. U bulutlarni minib boradi, Uni ulug‘lang. U Egamizdir! Huzurida shodlaning!

⁶U Xudodir, makoni muqaddasdir, Yetimlarning otasi, bevalar himoyachisidir.

⁷Xudo yolg‘izlarni xonadonga joylashtiradi, Asirlarni rohatga, erkinlikka olib chiqadi, Isyonkorlar esa qaqragan yerga ega bo‘ladi.

⁸Ey Xudo, O‘z xalqingning oldida borganingda, Sahro bo‘ylab yurish qilganingda, Zamin titradi, osmon yomg‘irini quydi.

⁹Ey Sinay tog‘ining Xudosi [1], Sening huzuringda, Ey Isroil xalqining Xudosi, Sening oldingda, Zamin titradi, osmon yomg‘irini quydi.

¹⁰Sen, ey Xudo, mo‘l yomg‘ir berding, Toliqqan yeringga [2] qaytadan kuch ato etding.

¹¹Xalqing o‘sha yerda boshpana topdi, Ey Xudo, himmatingdan muhtojlarni bahramand qilding.

¹²Rabbiydan amr keladi, Ayollarning katta jamoasi xushxabarni eltadi:

¹³“Shohlaru lashkarlar shosha–pisha qochadi!” Isroil ayollari chodirlarda o‘ljani bo‘lishib oladi!

¹⁴Hatto uyda qolganlar uchun ham Bordir kumush bilan qoplangan kaptar qanotlari, Yaltiroq oltin bilan qoplangan kaptar patlari.

¹⁵Qodir Xudo shohlarni to‘zg‘itganda, Zalmon tog‘iga [3] qor yoqqanday bo‘ldi.

¹⁶Ey Bashanning tog‘i [4], ulug‘vor tog‘, Ey cho‘qqilari ko‘p tog‘, Bashanning tog‘i!

¹⁷Ey cho‘qqilari ko‘p tog‘! Xudo makon qilib tanlagan toqqa [5] Nega hasad bilan qaraysan? Egamiz to abad u yerda istiqomat qiladi.

¹⁸Xudoning jang aravalari son–sanoqsizdir, Rabbiy Sinaydan muqaddas makoniga keladi [6].

¹⁹Yuksaklarga [7] chiqdi U, Asirlarni ortidan ergashtirdi. Xalqlardan hadyalar oldi, Hatto gunohkor isyonchilardan ham oldi. Axir, Parvardigor Egamiz u yerda yashaydi!

²⁰Rabbiyga olqishlar bo‘lsin, U har kun og‘irligimizni ko‘taradi. Xudo bizning najotimizdir.

²¹Xudoyimiz — najot berguvchi Xudo, Egamiz Rabbiy o‘limdan qutqaradi.

²²Xudo shubhasiz dushmanlar boshini yanchadi, Gunoh yo‘lidan yurgan odamning Bosh suyaklarini ham ezadi.

²³Rabbiy shunday deydi: “Dushmanlaringni Bashandan qaytarib kelaman, Ularni dengiz tubidan olib kelaman.

²⁴Oyog‘ingni dushmanlaring qoniga botirasan, Itlaring ham dushman qonini yalab, O‘z ulushini oladi.”

²⁵Ey Xudo, zafarli karvoning ko‘rinmoqda! Mening Shohim, Xudoyimning karvoni Muqaddas makoningga borayotgani ko‘rinmoqda!

²⁶Oldinda qo‘shiqchilar, orqada sozandalar, Ularning o‘rtasida childirma chalgan qizlar kuylar:

²⁷“Olqishlar ayting Xudoga buyuk jamoa ichra, Hamdu sanolar o‘qing Egamizga, Ey Isroilning manbaidan paydo bo‘lganlar!”

²⁸Ularning eng kichigi Benyamin qabilasi oldinda keladi, Ortidan to‘p bo‘lib Yahudo shahzodalari keladi, Zabulun, Naftali [8] shahzodalari ularga ergashadi.

²⁹Ey Xudo, ko‘rsatgin qudratingni! [9] Ey Xudo, ilgarigiday namoyon qil kuchingni!

³⁰Quddusdagi Ma’bading haqi–hurmati Shohlar Senga hadyalar keltiradi.

³¹Misrga, qamishzor orasidagi o‘sha yovvoyi hayvonga [10] tanbeh ber, Xalqlarga, o‘sha buqalar podasiga, buzoqlariga tanbeh bergin. Senga ta’zim qilib, kumushlarini nazr qilishsin. Urushdan lazzatlanuvchi bu xalqlarni to‘zg‘itgin.

³²Misrdan bronza keltiriladi [11], Habashiston [12] Senga qo‘llarin cho‘zib, ey Xudo, O‘lpon to‘lashga shoshilib qoladi.

³³[33-34] Xudoni tarannum eting, ey yer yuzi shohliklari, Samolar — azaliy samolar uzra chiqqan, Haybatli ovozi gulduragan Rabbiyga hamdu sanolar kuylang.

³⁵Hammaga e’lon qiling Xudoning qudratini, Uning ulug‘vorligi Isroil ustidadir, Uning qudrati samolardadir.

³⁶Xudo qo‘rqinchlidir O‘zining Muqaddas maskanida, Isroil xalqining Xudosi kuch–qudrat berar O‘z xalqiga. Xudoga olqishlar bo‘lsin!