Read O‘zbek tilidagi Muqaddas Kitob, 2013 Zabur 68 Bible Online

Zabur 68 - O‘zbek tilidagi Muqaddas Kitob, 2013 bible

Zabur 68

¹Ijrochilar rahbariga. “Nilufar” kuyiga aytilgan. Dovud sanosi.

²Ey Xudo, meni O‘zing qutqar, Suvlar bo‘g‘zimga qadar ko‘mdi.

³Botqoqqa cho‘kib borayotirman, Oyog‘imni qo‘ygani qattiq yer yo‘q. Chuqur suvlarga botib ketdim, Endi to‘lqinlar meni yutmoqda.

⁴Madad so‘rab, sillam quridi, Tomoqlarim qaqrab ketdi, Ey Xudoyim, Seni kutib, ko‘z nurim so‘ndi.

⁵Sababsiz mendan nafratlanganlar Boshimdagi sochimdan ham ko‘pdir. Ko‘pchilik sababsiz menga dushmandir, Ular jonimga qasd qilmoqchilar. Men o‘g‘irlamagan narsalarni ular Qaytib ber, deb meni majbur qilmoqdalar.

⁶Ey Xudo, aqlsizligimni O‘zing bilasan, Ayblarim Sendan aslo yashirin emas.

⁷Ey Sarvari Olam — Rabbiy, Sendan umid qilganlar Men tufayli uyatga qolmasinlar. Ey Isroil xalqining Xudosi, Senga yuz burganlar Men tufayli sharmanda bo‘lmasinlar.

⁸Seni deb haqoratga chidadim, Xijolatdan yuzlarim shuvut.

⁹Aka–ukalarimga go‘yo begonadayman, Tug‘ishganlarim orasida musofirdayman.

¹⁰Sening uyingga bo‘lgan sevgim ichimni yondirar, Seni haqoratlaganlar meni haqorat qilgan bo‘lar.

¹¹Faryod qilib, ro‘za tutganimda, Men masxara bo‘ldim.

¹²Kulfatda qolib, qanor kiyganimda [1], Ular ustimdan kuldilar.

¹³Shahar darvozasi oldida [2] o‘tirganlar Meni g‘iybat qilarlar, Mast–alastlar men to‘g‘rimda qo‘shiq aytarlar.

¹⁴Men esa, ey Egam, Senga ibodat qilaman. Ma’qul vaqtda, sodiq sevging soyasida, ey Xudo, Ishonchli najoting bilan javob ber menga.

¹⁵Meni qutqargin, botqoqqa botib ketmay, Mendan nafratlanganlardan xalos bo‘lay, Meni chuqur suvlardan saqlagin.

¹⁶To‘fon meni g‘arq qilmasin, Tubsiz suvlar meni yutmasin, Qabr menga og‘zin ochmasin.

¹⁷Javob ber ibodatimga, ey Egam, Naqadar ezgudir sodiq sevging, Buyuk shafqating ila menga yuz burgin.

¹⁸Men, O‘z qulingni jamolingdan bebahra qilma, Kulfatda qolganman, javob ber tezda.

¹⁹Yaqinroq kel, qutqargin meni, Dushmanlarimdan xalos qil meni.

²⁰Haqoratga duchor bo‘lganim, Sharmandayu sharmisor bo‘lganim O‘zingga ravshan. Hamma dushmanlarimni bilasan.

²¹Haqoratlar qalbimni yaralab, Tushkunlikka tushirdi. Bir hamdard izladim, hech kim yo‘q edi, Tasalli beruvchi izladim–u, topmadim.

²²Ovqatimga ular zahar soldilar, Chanqaganimda menga uzum sirkasi berdilar.

²³Dasturxonlari o‘zlariga tuzoq bo‘lsin, Hamtovoqlari uchun qopqon bo‘lsin.

²⁴Ko‘z nurlari so‘nsin, ko‘rmayin qolsin, Bellari to abad bukchayib qolsin.

²⁵Ular ustiga g‘azabingni sochgin, Qahring alanga olib, ularni yutib yuborsin.

²⁶Ularning makoni tashlandiq bo‘lib qolsin, Chodirlarida tirik bir jon qolmasin.

²⁷Sen urgan insonlarni ular ta’qib qiladi, Sen bergan yara azoblarini ular g‘iybat qiladi.

²⁸Gunohlari ustiga gunoh qo‘shgin, Ularni Sen oqlamagin.

²⁹Nomlari hayot kitobidan o‘chirilsin, Solihlar bilan yonma–yon yozilmasin.

³⁰Men azobda, kulfatda qolganman, Ey Xudo, najoting meni himoya qilsin.

³¹Nomini kuylab, Xudoni madh qilaman, Shukr aytib, Uni maqtayman.

³²Buqadan, shoxli, tuyoqli buzoqdan ko‘ra, Hamdlarim Egamni ko‘proq mamnun qiladi.

³³Mazlumlar buni ko‘rib, sevinsin, Xudoga intilayotganlar dadil bo‘lsin.

³⁴Egamiz muhtojlarni eshitadi, Asir bo‘lgan xalqidan nafratlanmaydi.

³⁵Osmonu yer Egamizni madh aylasin, Dengizlaru ulardagi jonzotlar madh aylasin.

³⁶Xudo Quddusga [3] najot beradi, Yahudo shaharlarini qayta tiklaydi, Xalq o‘rnashib, u yerni mulk qiladi.

³⁷Xudo qullarining avlodi u yerni egallaydi, Xudoni sevganlar u yerni maskan qiladi.