Read O‘zbek tilidagi Muqaddas Kitob, 2013 Zabur 7 Bible Online

Zabur 7 - O‘zbek tilidagi Muqaddas Kitob, 2013 bible

Zabur 7

¹Benyamin qabilasidan bo‘lgan Kushning qilmishlari tufayli Dovudning Egamizga aytgan marsiyasi.

²Senda panoh topaman, ey Egam Xudo, Payimga tushganlardan xalos et, qutqar meni.

³Yo‘qsa, ular meni sherday g‘ajib tashlaydi, Burda–burda qiladi, hech kim meni qutqarolmaydi.

⁴[4-5] Ey Egam Xudo! Agarda kimgadir nohaqlik qilgan bo‘lsam, Do‘stimni dushmaniga sotgan bo‘lsam mabodo, G‘animimni sababsiz talagan bo‘lsam, Ha, agarda u ishlarni qilgan bo‘lsam,

⁶Dushmanlarim ta’qib qilsin, tutsin meni, Tanamni tuproqqa qorsin, Jasadimni yerga tashlasin.

⁷Qani, g‘azabingni sochgin, ey Egam! Qo‘zg‘al yovlarimning qahriga qarshi! Ko‘rib, adolat qilgin!

⁸Xalqlarni atrofingga to‘plagin, Balanddagi taxtingda o‘tirib, Ular ustidan hukmronlik qilgin.

⁹Xalqlarni hukm qil Sen, ey Egam, Ey Egam, mening ham yuzimni yorug‘ qil, Bilasan–ku, solihman, begunohman.

¹⁰Fosiqlarning yovuzligi barham topsin, Solihlar barqaror bo‘lsin. Ongu yuraklarni sinaguvchi Sensan, Ey odil Xudo!

¹¹Mening qalqonimdir Xudo, Pokdillarga U najot beradi.

¹²Adolatli hakamdir Xudo, Qabihga U doim g‘azabini sochadi.

¹³Agar inson tavba qilmasa, Xudo qilichini charxlaydi, Kamonini tayyor qilib turadi.

¹⁴Qirg‘in qurollarini shay qilib qo‘ygan, Olovli o‘qlarini tayyorlab qo‘ygan.

¹⁵Ana, qabihlar qabihlikdan urug‘ orttiradi, Dardu balolardan homilador bo‘ladi, Oxir–oqibatda yolg‘onni tug‘adi.

¹⁶Ular chuqur qaziydilar, Ammo chohga o‘zlari qulaydilar.

¹⁷Ularning dardu balosi o‘ziga qaytadi, Zo‘ravonligi o‘zlarining boshiga yetadi.

¹⁸Egamizga, adolating uchun shukr, deyman. Xudoyi Taolo — Egamizga hamdu sano kuylayman.