Read O‘zbek tilidagi Muqaddas Kitob, 2013 Zabur 72 Bible Online

Zabur 72 - O‘zbek tilidagi Muqaddas Kitob, 2013 bible

Zabur 72

¹Osifning [1] sanosi. [1] Haqiqatdan ham, Isroil xalqiga, Yuragi pok bo‘lganlarga Xudo himmat qilar.

²Oyoqlarim toyib ketay, dedi, Sal bo‘lmasa sirpanib yiqilay, dedim.

³Fosiqning yashnayotganini ko‘rganimda, Takabburlarga hasad qildim.

⁴Ular og‘riq nimaligini bilmaydi [2], Tanalari soppa–sog‘, baquvvat.

⁵Boshqalarday ular dard tortmaydi, Boshqalarday ular azob chekmaydi.

⁶Kiborlik ularning bo‘ynidagi marjon bo‘ladi, Zo‘ravonlikni ular libos qilib kiyib olgan.

⁷Ularning ko‘zlarini yog‘ bosib qolgan, Xayollarida ahmoqona niyatlar to‘lib–toshgan.

⁸Takabburlar masxaralab, xusumat bilan gapiradi, Mag‘rurlanib, zulm bilan tahdid qiladi.

⁹Fosiqlar og‘izlari bilan osmonga da’vo qiladi, Tillari bilan yer yuzini mulk qilib oladi.

¹⁰Shu bois har kim ularga yuz buradi, Ularning so‘zlarini suv kabi ichadi [3].

¹¹Yana ular shunday deydilar: “Xudo qanday qilib bila oladi?! Xudoyi Taolo nimani ham bilardi?!”

¹²Fosiqlar ana shunaqa! Doimo betashvish boylik orttiradi.

¹³Ha, men bekorga yuragimni pok tutgan ekanman–da! Aybsizman, deya bekorga qo‘llarimni yuvibman–da!

¹⁴Axir, kun bo‘yi azob tortaman, Har kun ertalab jazo olaman.

¹⁵Men ham fosiq gaplarni gapiraverganimda, Sening sodiq farzandlaringga xoinlik qilgan bo‘lar edim.

¹⁶Ammo bularni tushunay, desam, Bu ish juda ham mashaqqatli tuyuldi.

¹⁷Xudoning Muqaddas maskaniga kirdim, Shundagina fosiqlar qismati ne bo‘lishini tushundim.

¹⁸Ey Xudo, chindan ham ularni sirpanchiq yerga qo‘ygansan, Ularni jarlikka uloqtirib, barbod qilasan.

¹⁹Ular birdan qirilib ketadi, Vahimadan qirilib, yo‘q bo‘ladi.

²⁰Ularning hayoti faqat tushdir, Uyg‘onganlarida unut bo‘ladi. Sen ham qo‘zg‘alganingda, ey Rabbiy, Ularning hayotiga chek qo‘yasan.

²¹G‘amga to‘lgan paytlarimda, Yuragimda dard paydo bo‘lganda,

²²Men nodon, johil bo‘lgan ekanman, Qarshingda ongsiz hayvon kabi bo‘lgan ekanman.

²³Shunday bo‘lsa ham, doimo Sen bilanman, Sen o‘ng qo‘limdan ushlagansan.

²⁴O‘gitlaring bilan menga yo‘l ko‘rsatasan, Oxiri meni shon–shuhrat ila kutib olasan.

²⁵Sendan boshqa kimim bor samoda?! Sendan o‘zgasini istamasman yer yuzida.

²⁶Tugab borishi mumkin tanamu qalbim, Ammo Sen, ey Xudo, qalbimning quvvatisan, Sen to abad barqarorligimsan.

²⁷Sendan uzoq bo‘lganlar halok bo‘ladi, Qirib tashlaysan Senga sodiq bo‘lmaganlarni.

²⁸Ey Xudo, Senga yaqin bo‘lganim esa menga yaxshidir. Ey Egam Rabbiy, Seni panohim qilib oldim, Sening hamma ishlaringni aytib yuraman.