Read O‘zbek tilidagi Muqaddas Kitob, 2013 Zabur 74 Bible Online

Zabur 74 - O‘zbek tilidagi Muqaddas Kitob, 2013 bible

Zabur 74

¹Ijrochilar rahbariga. “Xarob etma” kuyiga aytilgan. Osifning [1] sanosi. Qo‘shiq.

²Ey Xudo, Senga shukrlar aytamiz, Shukrlar aytamiz, Sen bizga yaqinsan, Mo‘jizalaring haqida odamlar gapiradi.

³Xudo aytar: “Belgilangan vaqtni tanlayman, Haqqoniylik bilan hukm qilaman.

⁴Zamin va undagi insonlar titragan paytda Zamin ustunlarini [2] mahkam ushlagan Menman.”

⁵Maqtanchoqlarga Xudo aytar: “Maqtanmagin”, Fosiqqa aytar: “Kuching bilan maqtanmagin.

⁶Gerdayib, samolarga kuchingni ko‘rsatma, Qaysarlarcha kiborlik bilan gapirma.”

⁷Hech kim sharqdan yoki g‘arbdan yoxud sahrodan Insonni yuksaltira olmaydi.

⁸Hukm qiladigan Xudodir, Birovni U yiqitar, boshqasini yuksaltirar.

⁹G‘azab kosasi Egamizning qo‘lida, Ziravor qo‘shilgan ko‘pikli sharobga [3] to‘la. U sharobni quyadi, Olamdagi jamiki fosiqlar esa Quyqumigacha ichib tugatadi.

¹⁰Men to abad Yoqubning Xudosi haqida gapiraman, Uni hamdu sano ila tarannum etaman.

¹¹Xudo aytar: “Fosiqlarning kuchini qirqaman, Solihlarning qudratini oshiraman.”