Read O‘zbek tilidagi Muqaddas Kitob, 2013 Zabur 76 Bible Online

Zabur 76 - O‘zbek tilidagi Muqaddas Kitob, 2013 bible

Zabur 76

¹Ijrochilar rahbari Yodutunga [1]. Osifning [2] sanosi.

²Faryod qilib, Xudoga yolvoraman, Eshitgin meni, deb Xudoga hayqiraman [3].

³Qayg‘uli kunimda Rabbiyga intildim, Tunda qo‘llarimni ko‘tarib iltijo qildim, Jonim tasalli topishni rad etdi.

⁴Ey Xudo, Seni o‘ylaganimda, Fig‘on chekaman, ruhim zaiflashadi.

⁵Tun bo‘yi Sen meni bedor qilding, Tilim kalimaga kelmas ruhan azoblanganimdan.

⁶Oldingi kunlar haqida o‘ylab yurdim, Eski davrlarni eslab yurdim.

⁷Tun bo‘yi o‘zim bilan o‘zim suhbat qurdim [4], Qalbim xayolga berilib, ruhim so‘rab–surishtirdi:

⁸“Rabbiy to abad bizni rad etarmikan? Hech qachon shafqat ko‘rsatmasmikan?

⁹Uning sodiq sevgisi to abad yo‘qolganmi? Uning va’dalari bir umrga tamom bo‘lganmi?

¹⁰Xudo shafqatli bo‘lishni unutib qo‘ydimi? Rahmdillik o‘rnini g‘azab egalladimi?”

¹¹O‘zimga o‘zim dedim: “Xudoyi Taolo o‘ng qo‘li orqali Endi bizga yordam bermayapti. Bu mening kulfatimdir.”

¹²Ey Egam, ishlaringni men yodga olaman, Azaliy mo‘jizalaringni esga olaman.

¹³Hamma ishlaringni xayolimdan o‘tkazaman, Qudratli ishlaring haqida fikr yuritaman.

¹⁴Sening yo‘ling, ey Xudo, muqaddasdir, Qaysi Xudo Senday buyukdir?!

¹⁵Mo‘jizalar yaratuvchi Xudo Sensan, Xalqlar orasida qudratingni ko‘rsatgan Sensan.

¹⁶Qudrating bilan o‘z xalqingni, Yoqub hamda Yusuf nasllarini qutqargansan.

¹⁷Ey Xudo, suvlar Seni ko‘rganda, Ha, suvlar seni ko‘rganda, qo‘rqib ketdilar, Tubsiz dengizlar larzaga keldi!

¹⁸Bulutlar yomg‘irin quydi, Samolar gumburlab yangradi, O‘qlaring har tomonda Yalt etib paydo bo‘ldi.

¹⁹Gumbur–gumbur eshitildi quyun ichida, Chaqmoqlaring olamni yoritdi, Zamin titrab, tebrandi.

²⁰Yo‘ling dengiz orqali o‘tdi, So‘qmog‘ing bahaybat suvlardan o‘tdi, Izlaring esa ko‘rinmas edi.

²¹Xalqingni qo‘y suruviday yetaklab bording, Muso, Horunni rahnamo qilib tanlading.