Read O‘zbek tilidagi Muqaddas Kitob, 2013 Zabur 77 Bible Online

Zabur 77 - O‘zbek tilidagi Muqaddas Kitob, 2013 bible

Zabur 77

¹Osifning [1] qasidasi. [1] Quloq soling, ey xalqim, o‘gitlarimga, Quloq tuting og‘zimdan chiqqan so‘zlarga.

²Og‘zimni ochaman masalga, O‘tmishning sirli saboqlarin o‘rgataman sizga.

³Bularni aytgan edi ota–bobolarimiz, Ulardan eshitganmiz, bilamiz.

⁴Egamizning hamdga loyiq ishlarini, Uning qudratini, U qilgan ajoyibotlarni Biz yashirmaymiz ularning bolalaridan, Hikoya qilarmiz kelgusi avlodlarga ham.

⁵Yoqub nasliga U farmon berdi, Isroilga qonun tayinladi Ota–bobolarimizga amr berib: “Bolalaringizga o‘rgating”, dedi [2].

⁶Toki kelajak nasllar bularni bilsin, Bilsin hatto tug‘ilmagan bolalar, O‘z navbatida bolalariga aytsin ular.

⁷Bolalari ham umidini bog‘lasin Xudoga, Xudoning ishlarini unutib qo‘ymay, Rioya etsin Uning amrlariga.

⁸Toki ular ota–bobolariga o‘xshab, O‘jar, isyonkor nasl bo‘lmasin. Yuragida Xudoga sadoqat bo‘lmagan, Ruhan beqaror nasl bo‘lmasin.

⁹O‘q–yoy bilan qurollangan Efrayim jangchilari [3] Jang kunida ortiga qaytdi [4].

¹⁰Ular Xudoning ahdiga rioya qilmadi, Uning qonunlari bo‘yicha yurishni rad qildi.

¹¹Ular unutdilar Xudoning qilgan ishlarini, Xudoning ularga ko‘rsatgan mo‘jizalarini.

¹²Misr diyoridagi Zo‘van tekisligida [5], Ularning ota–bobolari ko‘z o‘ngida Xudo mo‘jizalar ko‘rsatgandi.

¹³Dengizni yorib, o‘rtasidan ularni o‘tkazdi, Suvlarni devor kabi tik qilib qo‘ydi [6].

¹⁴Kunduzi ularni bulut orqali yetakladi, Tun bo‘yi alanga yorug‘i orqali yetakladi [7].

¹⁵U sahrodagi qoyalarni parchaladi, Dengizday mo‘l–ko‘l suvni ularga berdi.

¹⁶Qoyadan irmoqlarni chiqardi, Suvlarni daryolarday oqizdi [8].

¹⁷Ular sahroda Xudoyi Taologa qarshi isyon qilib, Unga qarshi gunoh qilaverdilar.

¹⁸Ular ataylab Xudoni sinadilar, Ko‘ngli tusagan ovqatni talab qildilar.

¹⁹Ular Xudoga qarshi so‘zlab, dedilar: “Sahroda Xudo bizga dasturxon yoza olarmidi?!

²⁰Mana, U qoyaga urganda, Suv daryo–daryo bo‘lib oqdi, Irmoqlar to‘lib–toshdi. Endi U O‘z xalqiga non bera olarmikan? Xalqini go‘sht bilan ta’minlay olarmikan?”

²¹Egamiz ularning gapini eshitib, Qattiq g‘azabga mindi. Yoqub nasliga qarshi g‘azab alangasini purkadi, Ha, Isroil nasliga qarshi qahrini sochdi [9].

²²Ular Xudoga ishonmadilar, Uning najotiga tayanmadilar.

²³Xudo samolardan turib amr berdi, Osmonning qopqalarini ochib yubordi.

²⁴Ular yesin, deb manna [10] yog‘dirdi, Osmonning donini ularga berdi.

²⁵Odamzod farishtalar nonidan yedi, Xudo ularga mo‘l–ko‘l taom yubordi.

²⁶U samolardan sharq shamolini estirdi, Qudrati bilan janub shamoliga yo‘l ko‘rsatdi.

²⁷U changday mo‘l qilib, xalqiga go‘sht yog‘dirdi, Ha, dengizdagi qumday mo‘l qilib qushlar yog‘dirdi.

²⁸Bularni ularning qarorgohiga yog‘dirdi, Ularning chodirlari atrofiga tushirdi.

²⁹Ular to‘ygunlaricha yedilar, Xudo ularga ko‘ngillari tusaganini berdi.

³⁰Biroq hali ko‘ngli tusaganiga to‘ymagan, Luqmalari hali ularning og‘izlarida ekan,

³¹Xudo g‘azabini ularga sochdi, Ularning kuchlilarini o‘ldirdi, Isroilning gulday yigitlarini yer tishlatdi [11].

³²Shularga qaramay, ular gunoh qilaverdilar, Xudoning mo‘jizalariga ishonmadilar.

³³Xudo ularning kunlarini bir nafasday bitirdi, Ularni vahimaga solib, umrlarini barbod qildi.

³⁴Ba’zilarini Xudo o‘ldirdi, Shundagina qolganlari Unga intildi, Tavba qilib, yana Xudoga qaytdi.

³⁵Ular shunday deb esladilar: “Ha, Xudo suyangan qoyamiz, Bizning qutqaruvchimiz Xudoyi Taolo.”

³⁶Ammo Xudoga xushomad qilardilar, Unga tillari bilan yolg‘on so‘zlashardi.

³⁷Yuraklarida esa Xudoga sodiq emas edilar, Uning ahdiga bevafolik qildilar.

³⁸Xudo–chi, shafqat qildi, Kechirdi ularning gunohlarini, Qirib tashlamadi ularni, Ko‘pincha U g‘azabini bosdi, Butun g‘azabini sochmadi.

³⁹Xudo esladi: “Ular shunchaki bandalardir, Esib, boshqa qaytib kelmas shamoldir.”

⁴⁰Sahroda Xudoga qanchalar ko‘p isyon qildilar! Dashtu biyobonda Uni xafa qildilar.

⁴¹Xudoni ular takror–takror sinadilar, Isroil xalqining Muqaddas Xudosini ranjitdilar.

⁴²Ular Xudoning qudratini, Ularni dushmandan qutqargan kunni esdan chiqardilar.

⁴³Xudo Misrda ko‘rsatgan mo‘jizalarni, Ha, Zo‘van tekisligida [12] ko‘rsatgan ajoyibotlarni unutdilar.

⁴⁴Misrdagi daryolarni Xudo qonga aylantirdi, Misrliklar irmoqlardan suv icholmay qoldi.

⁴⁵Ularni yeb bitirsin, deya pashshalar galasini yubordi, Yurtni vayron qilsin, deya qurbaqalar yubordi.

⁴⁶Ularning hosilini Xudo chigirtkalarga [13] yem qildi, Ularning mehnati mahsulini chigirtkalarga berdi.

⁴⁷Uzumzorlarini do‘l bilan yakson qildi, Shikamora–anjir daraxtlarini jalada nobud etdi.

⁴⁸Ularning chorvasini do‘lga duchor qildi, Ularning podasini yashin alangasiga berdi.

⁴⁹Buzg‘unchi farishtalari to‘dasini yuborganday Xudo ularga alangali g‘azabini, qahrini, Nafratini hamda musibatni sochdi.

⁵⁰U Misrdan g‘azabini qaytarmadi, Ularning jonlariga shafqat qilmadi, Ularni vaboga duchor qildi.

⁵¹Misrning hamma to‘ng‘ichlarini urdi [14], Ha, Xom avlodlarining [15] uylaridagi Qudratining ilk hosilini yo‘q qildi.

⁵²O‘z xalqini esa Xudo qo‘yday yetaklab chiqdi, Ularni sahro bo‘ylab suruvday boshlab bordi.

⁵³Egamiz eson–omon boshlab bordi, Ular qo‘rqmadilar, Ularning g‘animlarini esa dengiz yutdi.

⁵⁴Egamiz xalqini O‘z muqaddas yurtiga, O‘z kuchi bilan qo‘lga kiritgan toqqa olib keldi.

⁵⁵O‘z xalqining oldidan boshqa xalqlarni [16] quvdi, Ularning yurtini mulk qilib bo‘lib berdi, Isroil qabilalarini ularning chodirlarida o‘rnashtirdi.

⁵⁶Ular hamon Xudoyi Taoloni sinardilar, Unga qarshi isyon qilib, farmonlariga bo‘ysunmadilar.

⁵⁷Otalari kabi bevafolik qilib, xoinlik qildilar, Yaroqsiz kamonga o‘xshab ishonchsiz chiqdilar.

⁵⁸Sajdagohlari bilan ular Xudoni g‘azablantirdilar, Butlari bilan Uning rashkini qo‘zg‘atdilar.

⁵⁹Bularni eshitganda Xudo, g‘azabga mindi, Shundan so‘ng Isroilni tamom rad etdi.

⁶⁰U Shilo‘dagi [17] O‘z maskanini, Insonlar orasida tikkan chodirini tark etdi.

⁶¹Dushmanga asirlikka berdi ahd sandig‘ini, O‘zining qudratiyu shuhrati ramzini [18].

⁶²O‘z xalqini U qilichga ro‘para qildi, G‘azabini tanlagan xalqiga sochdi.

⁶³Yigitlarini alanga yamlamay yutdi, Qizlari nikoh qo‘shiqlarini aytolmay qoldi.

⁶⁴Ruhoniylari qilich tig‘idan yiqildi, Ruhoniylar bevalari aza tutolmay qoldi.

⁶⁵Shunda Rabbiy qo‘zg‘aldi uyqudan uyg‘onganday, Sharobdan hayqirayotgan bahodirday.

⁶⁶Dushmanlarini U tirqiratib quvdi, Ularni abadiy sharmandalikka duchor qildi.

⁶⁷Xudo Yusuf chodirini rad etdi, Efrayim qabilasini [19] tanlamadi.

⁶⁸Uning o‘rniga Yahudo qabilasini [20], O‘zi sevgan Sion tog‘ini tanladi [21].

⁶⁹Abadiy o‘rnatgan yer kurrasi kabi, Samolar kabi O‘z muqaddas maskanini qurdi.

⁷⁰Xudo O‘z quli Dovudni tanlab oldi, Qo‘y qo‘rasidan uni chaqirib oldi.

⁷¹U Dovudni sovliq qo‘y, qo‘zilarga cho‘ponlikdan oldi. O‘zining xalqi Isroilga, Yoqub nasliga cho‘pon qilib tayinladi.

⁷²Dovud ularga halollik bilan cho‘ponlik qildi, Mohirlik bilan ularni yetaklab bordi.