Read O‘zbek tilidagi Muqaddas Kitob, 2013 Zabur 78 Bible Online

Zabur 78 - O‘zbek tilidagi Muqaddas Kitob, 2013 bible

Zabur 78

¹Osifning [1] sanosi. [1] Ey Xudo, begona xalqlar Tanlagan yurtingni bosib oldi, Ular Muqaddas Ma’badingni bulg‘adi, Quddusni vayronaga aylantirdi.

²Biz qullaringmiz. Ular qullaringning jasadlarini Qushlarga yemish qilib berdilar. Taqvodor xalqingning etini Zamindagi yovvoyi hayvonlarga berdilar.

³Quddus atroflarida ular qonimizni suvday to‘kdi, Jasadlarni dafn qilishga biron zot qoldirmadi.

⁴Qo‘shnilarimiz oldida masxara bo‘ldik, Atrofimizdagilarga kulgi, o‘yinchoq bo‘ldik.

⁵Ey Egam, qachongacha bizdan g‘azablanasan? To abadmi? Qachongacha rashking alangaday yonadi?

⁶Seni tan olmaydigan xalqlar uzra, Senga sajda qilmaydigan shohliklar uzra G‘azabingni sochgin.

⁷Ular xalqing Isroilni [2] yeb bitirdi, Yurtini tashlandiq sahroga aylantirdi.

⁸Bizga otalarimiz gunohlarini eslatma, Bizga tezda shafqatingni ko‘rsat, Axir, biz oyoq osti bo‘lib ketdik–ku!

⁹O‘z shuhrating haqi, bizga madad ber, Ey najotkorimiz Xudo! O‘z noming haqi, bizni qutqar, Gunohlarimizni kechir.

¹⁰Nima uchun begona xalqlar: “Qayerda ekan–a ularning Xudosi”, deya aytmog‘i kerak?! Xalqlardan o‘ch olganingni biz ko‘raylik, Axir, ular bizning qonimizni to‘kkan.

¹¹Asirlaring fig‘onlarini eshitgin, Buyuk qudratingni namoyish qilib, O‘limga mahkum bo‘lganlarni qutqargin.

¹²Ey Rabbiy, qo‘shni xalqlar Seni haqoratlagani uchun Ularga yetti baravar qaytargin.

¹³Biz Sening xalqing, yaylovdagi suruvingmiz, Senga to abad shukr aytarmiz, Nasldan naslga Seni takror madh qilarmiz.