Read O‘zbek tilidagi Muqaddas Kitob, 2013 Zabur 79 Bible Online

Zabur 79 - O‘zbek tilidagi Muqaddas Kitob, 2013 bible

Zabur 79

¹Ijrochilar rahbariga. “Nilufar gullar” kuyiga aytilgan. Osifning [1] guvohligi. Sano.

²[2-3] Tingla bizni, ey Isroilning Cho‘poni, Yusuf naslini [2] qo‘y suruviday yetaklab chiqqan Sensan, Karublar o‘rtasida taxt qurgansan, Efrayim, Benyamin, Manashe [3] oldida nuringni soch. Qudratingni ko‘rsat, bizni qutqargani kel.

⁴Ey Xudo, bizni oldingi holimizga qaytargin, Jamoling bizga nurlarini sochsin, najot topaylik.

⁵Ey Parvardigori Olam — Egamiz, Qachongacha g‘azablanib, ibodatimizni rad etasan?

⁶Ko‘z yoshlar berding bizga non o‘rniga, Chelak to‘la ko‘z yoshlarni bizga ichirding.

⁷Qo‘shnilar bizdan nafratlanishiga imkon berding, Dushmanlarimiz bizni masxara qilmoqda.

⁸Ey Parvardigori Olam, bizni oldingi holimizga qaytargin, Jamoling bizga nurlarini sochsin, najot topaylik.

⁹Tok novdasini sug‘urganday, Bizni Misrdan keltirding. Begona xalqlarni quvib, bizni o‘tqazding.

¹⁰Biz uchun tuproq tayyorlading, Ildiz otib, yurtni to‘ldirdik.

¹¹Tog‘lar bizning soyamiz bilan qoplandi, Bahaybat sadrlar ham novdalarimiz bilan qoplandi.

¹²Biz shoxlarimizni dengizgacha [4] yoydik, Novdalarimiz Furot daryosigacha cho‘zildi.

¹³Nega endi bog‘ning devorlarini buzib tashlading? O‘tgan–ketgan mevalarini yulsin debmi?

¹⁴Yovvoyi to‘ng‘izlar uni xarob qiladi, Yovvoyi jonivorlar [5] undan qornini to‘yg‘izadi.

¹⁵Qayt yana bizga, ey Parvardigori Olam! Nazar solgin, qara samodan, Bu tok novdasini qo‘riqlagin.

¹⁶O‘ng qo‘ling o‘tqazgan ildizni, O‘zing uchun kuchaytirgan shoxchani [6] qo‘riqlagin.

¹⁷G‘animlaring uzum tokingni qirqqan edi, Uzum tokingni olovda yondirgan edi, G‘azabli boqishingdan ular yo‘q bo‘lsin.

¹⁸O‘zing tanlaganingga, O‘zing uchun kuchli qilgan xalqqa [7]tayanch bo‘lgin.

¹⁹Shunda biz hech qachon Sendan qaytmaymiz, Senga sajda qilamiz, bizga hayot ato qil.

²⁰Ey Parvardigori Olam — Egamiz, Bizni oldingi holimizga qaytargin, Jamoling bizga nurlarini sochsin, najot topaylik.