Read O‘zbek tilidagi Muqaddas Kitob, 2013 Zabur 80 Bible Online

Zabur 80 - O‘zbek tilidagi Muqaddas Kitob, 2013 bible

Zabur 80

¹Ijrochilar rahbariga. Soz jo‘rligida. Osifning [1] sanosi.

²Xudoga, qudratimiz manbaiga Sevinch bilan kuylang, Yoqubning Xudosiga shodlik ila hayqiring!

³Qo‘shiq kuylang, doira cherting, Xushovoz lira, arfa chaling.

⁴Burg‘u chaling yangi oy bayramida, Oy to‘lganda, Bayram kunimizda [2].

⁵Isroil uchun bu qonundir, Yoqubning Xudosi farmonidir.

⁶Misr yurti ustiga bostirib borganda, Xudo buni Isroilga [3] qonun qilib berdi. Men notanish bir ovozni eshitdim:

⁷“Yukni oldim yelkangizdan, — deydi u. — Qo‘llaringiz savatdan ozod bo‘ldi [4].

⁸Menga faryod qildingiz kulfatda, sizni qutqardim, Bulutlar orasidan sizlarga javob berdim, Mariva suvlarida [5] sizlarni sinadim.

⁹Eshiting, ey xalqim, tanbeh beraman sizga, Ey Isroil, koshkiydi quloq solsangiz Menga!

¹⁰Orangizda begona xudolar bo‘lmasin, Boshqa xudolarga sajda qilmanglar.

¹¹Men sizlarning Egangiz Xudoman, Sizlarni Misr yurtidan Men olib chiqqanman, Og‘zingizni katta oching, Men uni to‘ldiraman.

¹²Ey xalqim, siz esa ovozimga quloq solmadingiz, Ey Isroil, Menga itoat etishni rad etdingiz.

¹³O‘z bilganingizcha yashang, deya Yuraklaringizni o‘jarligicha qoldirdim.

¹⁴Eh, qaniydi siz Menga quloq solsangiz, Ey Isroil, Mening yo‘llarimdan yursangiz!

¹⁵Tezda dushmanlaringizni bo‘ysundirardim, Sizning g‘animlaringizga zarba berardim.

¹⁶Men, Egangizdan nafratlanganlar Qo‘rquvdan g‘ujanak bo‘lardi, Ularning halokati to abad davom etardi.

¹⁷Sizlarni bug‘doyning eng yaxshisi bilan boqardim, Qoyadan asal chiqarib, sizlarni to‘ydirardim.”