Read O‘zbek tilidagi Muqaddas Kitob, 2013 Zabur 82 Bible Online

Zabur 82 - O‘zbek tilidagi Muqaddas Kitob, 2013 bible

Zabur 82

¹Osifning [1] sanosi. Qo‘shiq.

²Ey Xudo, sukut saqlamagin, Jimjit bo‘lma, ey Xudo, jim turmagin.

³Dushmanlaring shovqin–suron solmoqda, G‘animlaring isyon qilmoqda.

⁴Ayyorlik bilan ular xalqingga fitna qiladi, Sen ardoqlaganlarga qarshi qasd qiladi.

⁵Ular aytar: “Qani, o‘sha xalqning ildizini quritaylik, To abad unutilsin Isroilning nomi.”

⁶[6-8] Edomliklar va Ismoil avlodlari, Mo‘abliklar [2] va Hojar nasllari [3], Gabol [4], Ommon va Omolek [5] xalqlari, Tir xalqi bilan Filistiya [6] Yakdil bo‘lib fitna qiladi, Senga qarshi ittifoq tuzadi.

⁹Lut nasli [7] bilan ittifoq tuzib, Ossuriya ham ularga qo‘shilgandi.

¹⁰Ularni Midiyonlarni jazolaganingday [8] jazola, Xishon soyligida Sisaro, Yobinni qirganingday [9] jazola.

¹¹Ular Endo‘rda halok bo‘lgandilar, Yerga tashlangan go‘ngday bo‘lgandilar.

¹²Oriv va Zayovday [10] qilib, ularning yo‘lboshchilarini o‘ldir, Barcha shahzodalarini Zevax va Zalmunoday [11] qilgin.

¹³Axir, ular: “Xudoning o‘tloqlarini O‘zimizniki qilib olaylik”, dedilar.

¹⁴Ey Xudoyim, ularni xazonday sovurgin, Shamoldagi somonday ularni uchirgin.

¹⁵[15-16] O‘rmonni alanga yondirganday, Ularni bo‘ronlaring ila ta’qib qil. Tepaliklarni olov bilan kuydirganday Ularni dovullaring ila dahshatga sol.

¹⁷Yuzlarini sharmandalikdan qizartir, Toki ular, ey Egam, Senga intilsin.

¹⁸Ular doim sharmanda bo‘lib, qo‘rquvga tushsin, Badnom bo‘lib, yo‘q bo‘lib ketsin.

¹⁹Ular bilsin yolg‘iz Sen Egamiz ekaningni, Sen yer yuzida buyuk hukmdor ekaningni.