Read O‘zbek tilidagi Muqaddas Kitob, 2013 Zabur 83 Bible Online

Zabur 83 - O‘zbek tilidagi Muqaddas Kitob, 2013 bible

Zabur 83

¹Ijrochilar rahbariga. Soz jo‘rligida. Ko‘rax naslining [1] sanosi.

²Sening makoning ajoyibdir, Ey Sarvari Olam!

³Ey Egam, Sening hovlingga kirmoqni Jonim istar, hatto orziqar. Ey barhayot Xudo! Qalbim, vujudim Sevinch ila Senga kuylar.

⁴Ey Sarvari Olam, Shohim, Xudoyim! Qurbongohing yonida chumchuq ham bir uy topgan, Polaponlarim uchun joy topay, deya Qaldirg‘och ham o‘zi uchun bir in qurgan.

⁵Baxtlidir Sening uyingda istiqomat qiladiganlar, Ular doim Senga hamdu sano aytarlar.

⁶Baxtlidir Sendan qudrat olgan odamlar, Quddusni chin dildan ziyorat qilishga intiladiganlar.

⁷Qaqragan soylikdan [2] ular o‘tar ekanlar, Buloqlar oqa boshlar, Ilk yomg‘ir bu yerni suv havzalariga [3] to‘ldirar.

⁸Ular yurgan sari kuchayib borar, Ey Xudo, ular Quddusda [4] huzuringda hozir bo‘lar.

⁹Ey Parvardigori Olam — Egam, eshit ibodatimni, Ey Yoqubning Xudosi, tinglagin meni.

¹⁰Ey Xudo, qara shohga — qalqonimizga, O‘zing moy surtib tanlaganga lutf qilgin.

¹¹Sening hovlilaringda o‘tgan bir kun Afzaldir boshqa yerda o‘tgan ming kundan. Bo‘lsaydim, ey Xudoyim, Sening uyingda darvozabon, Fosiqlar chodirlarida yashagandan ko‘ra.

¹²Ey Parvardigor Egam, quyosh, qalqonsan, Sen bizga mehribonlik ko‘rsatib, shon–shuhrat ato etasan. Ey Egam, to‘g‘ri yurganlardan Ne’matingni darig‘ tutmaysan.

¹³Ey Sarvari Olam, Sendan umid qilgan odam baxtlidir!