Read O‘zbek tilidagi Muqaddas Kitob, 2013 Zabur 85 Bible Online

Zabur 85 - O‘zbek tilidagi Muqaddas Kitob, 2013 bible

Zabur 85

¹Dovud ibodati. [1] Tinglagin, ey Egam, javob ber menga, Men muhtoj hamda yo‘qsilman.

²Taqvodorman, jonimni asragin, Senga umid qilaman, men, qulingni qutqargin. Sen mening Xudoyimsan.

³Shafqat qilgin menga, ey Rabbiy, Kun bo‘yi senga iltijo qilmoqdaman.

⁴Men, qulingga shodlik baxsh etgin, Ey Rabbiy, men Senga yuragimni ochaman.

⁵Sen, ey Rabbiy, yaxshi, kechirimlisan, Senga iltijo qilganlarga Sodiq sevgingni ko‘rsatasan.

⁶Ibodatimga quloq sol, ey Egam, Shafqat so‘rab qilgan iltijoimga diqqat qil.

⁷Og‘ir kunda Senga iltijo qilaman, Iltijolarimga Sen javob berasan.

⁸Ey Rabbiy, xudolar orasida Hech qaysisi Senga o‘xshamaydi, Bironta buyuk ishni Seniki bilan qiyoslab bo‘lmaydi.

⁹Jamiki xalqlarni Sen yaratgansan, Ey Rabbiy, ular kelib, Senga ta’zim qiladi, Nomingga shuhrat keltiradi.

¹⁰Zero, Sen buyuksan, mo‘jizalar ko‘rsatasan, Sen tanho Xudosan.

¹¹Yo‘lingni menga ko‘rsat, ey Egam, Toki to‘g‘ri so‘qmoqlaringdan yuray, Menga sobit qalb bergin, Men Sendan qo‘rqayin.

¹²Ey Rabbim Xudo, butun yuragim ila Senga shukr aytayin! To abad Sening nomingni ulug‘layman.

¹³Menga bo‘lgan sodiq sevging g‘oyat buyukdir, O‘liklar diyoridan [1] jonimni qutqargansan.

¹⁴Ey Xudo, takabburlar menga hujum qilmoqda, Zo‘ravonlar to‘dasi jonim payiga tushgan. Ular Senga aslo e’tibor bermaydi.

¹⁵Sen, ey Rabbiy, rahmdil va inoyatli, Jahli tez chiqmaydigan Xudosan, Sodiq sevging mo‘ldir.

¹⁶Holimga boq, mehr–shafqat qil, Men qulingman, o‘z cho‘ringning o‘g‘liman. Menga qudratingdan ato qil, Meni qutqargin.

¹⁷Marhamating alomatini menga ko‘rsatgin, Toki g‘animlarim buni ko‘rib, sharmanda bo‘lsin. Meni qo‘llab, tasalli bergansan, ey Egam.