Read O‘zbek tilidagi Muqaddas Kitob, 2013 Zabur 89 Bible Online

Zabur 89 - O‘zbek tilidagi Muqaddas Kitob, 2013 bible

Zabur 89

¹Xudo odami Musoning ibodati.

²Ey Rabbiy, nasllar osha Sen panohimiz bo‘lgan eding.

³Tog‘lar hali paydo bo‘lmasdan oldin, Yeru olamni yaratmasingdan oldin, Abadulabad Sen Xudosan.

⁴Sen insonni tuproqqa qaytarasan [1], “Qaytinglar, ey bandalar tuproqqa”, deb aytasan.

⁵Ming yil Sening nazaringda bir kundaydir, Qisqa bir tun vaqtidaydir.

⁶Sen odamlarni supurib tashlaysan, Ular go‘yo tushga o‘xshaydi. Ular tongda ungan yangi maysa kabidir. Tongda maysa yangidan o‘sib chiqsa ham Oqshomda so‘lib, xazon bo‘ladi.

⁷Sening g‘azabingdan biz tugadik, Qahringdan biz vahimaga tushdik.

⁸Gunohlarimizni Sen oldingga keltirding, Yashirin gunohlarimizni nurlaring yoritib turadi.

⁹Kunlarimiz Sening g‘azabing ostida o‘tadi, Yillarimiz bir oh kabi tez nihoyasiga yetadi.

¹⁰Kunlarimiz yetmish yil ekan, Agar bardam bo‘lsak, sakson yil ekan. Eng ajoyib yillar zahmat, jafo bilan kecharkan, Umrimiz tez o‘tar, o‘zimiz uchib ketarmiz.

¹¹Sening g‘azabing qudratini kim bila olar?! Qahring, O‘zingga loyiq qo‘rquv kabi buyukdir.

¹²Umrimiz kunlarini sanashni bizga o‘rgatgin, Toki biz dono qalbga ega bo‘laylik.

¹³Kel, ey Egam! Qachongacha kutamiz?! O‘z qullaringga shafqat qilgin!

¹⁴Saharda sodiq sevging bilan bizni qondirgin, Umrimiz bo‘yi qo‘shiq aytib, xursand bo‘laylik.

¹⁵Kulfatlar ko‘rdik ko‘p kunlar, Bizni mahzun etganding qancha yillar, O‘sha kunlar evaziga bizni xursand qil.

¹⁶Biz, O‘z qullaringga qudratli ishlaring ko‘rinsin, Bizning naslimiz ulug‘vorligingni ko‘rsin.

¹⁷Ey Rabbimiz Xudo, lutf–karaming bizga yor bo‘lsin, Ishlarimizga omad bergin, Ha, ishlarimizga baraka bergin!