Read O‘zbek tilidagi Muqaddas Kitob, 2013 Zabur 90 Bible Online

Zabur 90 - O‘zbek tilidagi Muqaddas Kitob, 2013 bible

Zabur 90

¹Xudoyi Taolo panohida yashaydiganlar Qodir Xudo soyasida orom topar.

²Men Egamga shunday deyman: “Sen panohimsan, qal’amsan, Men umid bog‘lagan Xudoyimsan.”

³Albatta U xalos etar seni ovchining tuzog‘idan, Xalos etar seni qirg‘in keltiruvchi vabodan.

⁴Seni U patlari ostiga olar, Uning qanotlari ostida panoh topasan, Sadoqati bilan senga qalqon, devor bo‘lar.

⁵Shunda qo‘rqmaysan tunning vahimasidan, Qo‘rqmaysan kunduzi uchgan o‘qdan,

⁶Zulmatda bildirmay keladigan vabodan, Qoq peshinda qirg‘in keltiruvchi o‘latdan.

⁷Mingtasi chap yoningda yiqilib qoladi, O‘n mingtasi o‘ng yoningda yiqilib qoladi, Ammo bu kulfatlar senga yaqin kelmaydi.

⁸Faqat ko‘zlaringni och, shunda ko‘rasan Fosiqning qanday jazo olganini.

⁹[9-10] Agar Egamizni panohing qilsang, Boshingga biron baxtsizlik kelmas. Xudoyi Taoloni qo‘rg‘oning qilsang, Biron falokat chodiringga yo‘lamas.

¹¹U sen to‘g‘ringda farishtalariga amr beradi, Farishtalar hamma yo‘llaringni qo‘riqlaydi.

¹²Oyog‘ing toshga qoqilib ketmasin, deya Farishtalar qo‘llarida seni ko‘tarib boradi.

¹³Sheru zaharli ilon [1] ustidan bosib o‘tasan, Yirtqich shervachcha, ilonni oyog‘ing ostida ezg‘ilaysan.

¹⁴Egamiz shunday deydi: “U meni yaxshi ko‘rgani uchun Men uni qutqaraman. Meni bilgani uchun Men uni himoya qilaman.

¹⁵U iltijo qilganda Men javob beraman, Og‘ir kunlarida u bilan birga bo‘laman, Uni qutqarib, unga izzat ko‘rsataman.

¹⁶Uzoq umr berib, uni mamnun qilaman, Unga najot beraman.”