Read O‘zbek tilidagi Muqaddas Kitob, 2013 Zabur 91 Bible Online

Zabur 91 - O‘zbek tilidagi Muqaddas Kitob, 2013 bible

Zabur 91

¹Sano. Shabbat kuni aytilgan qo‘shiq.

²Ey Egam, Senga shukr aytmoq yaxshidir, Ey Xudoyi Taolo, Senga hamdu sano kuylamoq yaxshidir.

³E’lon qilmoq yaxshidir subhda sodiq sevgingni, E’lon qilmoq yaxshidir kechalari sadoqatingni.

⁴Yaxshidir aytmoq bularni musiqa chalib O‘n torli asbobda, lirada, arfa jo‘rligida!

⁵Ey Egam, qudratli ishlaringdan men shodman, Qilgan ishlaringdan xursand bo‘lib kuylayman.

⁶Ey Egam, ishlaring naqadar buyukdir! O‘ylaring juda ham terandir!

⁷Aqlsiz kimsa buni bila olmaydi, Ahmoq kimsa buni tushuna olmaydi:

⁸Garchi fosiqlar maysa kabi unib chiqsa ham, Badkirdorlar gullab–yashnasa ham, Ular to abad yo‘q bo‘ladi.

⁹Sen–chi, ey Egam, to abad ulug‘vorsan.

¹⁰Ey Egam, dushmanlaring albatta yo‘q bo‘ladi, Ular shubhasiz halok bo‘ladi. Badkirdorlar hammasi tarqalib ketadi.

¹¹Meni yovvoyi buqaday kuchli qilding, Qudrating bilan menga qaytadan kuch ato qilding [1].

¹²Dushmanlarim mag‘lubiyatin ko‘zlarim ko‘rdi, Badkirdorlar zavolin quloqlarim eshitdi.

¹³Solihlar palma daraxtiday gullab–yashnaydi, Lubnondagi sadr daraxtiday [2] yuksaladi.

¹⁴Ular Egamizning uyiga o‘tqazilgan, Xudoyimizning hovlisida ular yashnaydi.

¹⁵Keksalikda ham hamon hosil beradi, Yam–yashil, navqiron bo‘lib turaveradi.

¹⁶Ular birgalikda shunday deb e’lon qiladi: “Egamiz odildir! U mening suyangan qoyamdir, Unda nohaqlik yo‘qdir.”