Read O‘zbek tilidagi Muqaddas Kitob, 2013 Zabur 93 Bible Online

Zabur 93 - O‘zbek tilidagi Muqaddas Kitob, 2013 bible

Zabur 93

¹Ey Egam, Sen qasoskor Xudosan, Sen, ey qasoskor Xudo, nuringni soch!

²Qani, bo‘l, ey yer yuzini hukm etguvchi, Kiborlarga loyiq jazosini ber.

³Qachongacha fosiqlar tantana qilar? Ey Egam, qachongacha?

⁴Og‘izlaridan balandparvoz so‘zlar otilib chiqyapti–ku! Hamma badkirdorlar maqtanyapti–ku!

⁵Ey Egam, ular xalqingni ezyapti, O‘zing tanlagan elatingga zulm qilyapti.

⁶Beva, musofirni ular o‘ldiryapti, Yetimlarni yo‘q qilyapti.

⁷Ular aytyapti: “Egamiz ko‘rmas, Yoqubning Xudosi e’tibor bermas.”

⁸Tushunib oling, ey xalq orasidagi tentaklar. Qachon sizlarga aql kirar, ey ahmoqlar?!

⁹Quloqni yaratgan eshitmaydimi?! Ko‘zni ato etgan ko‘rmaydimi?!

¹⁰Xalqlarga tanbeh beruvchi jazolamaydimi?! Uning O‘zi insonga o‘rgatadi–ku!

¹¹Egamiz insonning niyatini anglaydi, Niyatlarimiz behudaligini biladi.

¹²Ey Egam, baxtlidir Sening tanbehingni olganlar, Baxtlidir Sening qonuningdan o‘rganuvchilar.

¹³Yomon kunlardan ularni Sen omon saqlaysan. Fosiq uchun chuqur qazilguncha omon bo‘ladilar.

¹⁴Ey Egam, O‘z xalqingni tark etmaysan, O‘zing tanlagan elatingni tashlab qo‘ymaysan.

¹⁵Hukmning asosi yana adolat bo‘ladi, Jamiki pokdillar adolatni qo‘llab–quvatlaydi.

¹⁶Fosiqlardan kim meni himoya qiladi? Badkirdorlarga qarshi kim men tomon bo‘ladi?

¹⁷Ey Egam, agarda Sen menga yordam bermaganingda, Mening jonim tezda o‘lim sukunatiga cho‘kardi.

¹⁸“Oyoqlarim qoqiladi”, deb o‘ylaganimda, Ey Egam, sodiq sevging meni qo‘lladi.

¹⁹Ichim xavotirga to‘lib ketganda, Sen bergan tasalli menga quvonch keltirdi.

²⁰Zolim hukmdorlar Xudoga sherik bo‘larmi?! Axir, ular farmonlari bilan kulfat keltiradi–ku!

²¹Ular solihlarga qarshi birlashadi, Gunohsizlarni o‘limga mahkum etadi.

²²Ammo Egam mening qal’amdir, Mening panoh qoyam Xudodir.

²³Fosiqligi uchun Egamiz ularni qirib tashlaydi, Gunohlari uchun ularga qaytaradi. Ha, Egamiz Xudo ularni ildizidan quritadi.