Read O‘zbek tilidagi Muqaddas Kitob, 2013 Zabur 95 Bible Online

Zabur 95 - O‘zbek tilidagi Muqaddas Kitob, 2013 bible

Zabur 95

¹Ey olam, Egamizni tarannum eting! Egamizga yangi bir qo‘shiq ayting.

²Egamizni tarannum eting, Unga olqishlar bo‘lsin, Har kun Uning najotidan so‘ylang.

³E’lon qiling elatlar orasida Uning shuhratini, Jamiki xalqlar orasida Uning ajoyibotlarini.

⁴Egamiz buyukdir, ko‘p maqtovga loyiqdir, Jamiki xudolardan U izzatlidir.

⁵Zotan, xalqlarning hamma xudolari butlardir, Egamiz esa samolarni yaratgandir.

⁶Shuhratu ulug‘vorlik Uning huzuridadir, Qudratu go‘zallik Uning Muqaddas maskanidadir.

⁷Egamizga hamdlar ayting, ey zamin xalqlari! Egamizning qudratiyu shuhratiga hamdlar o‘qing!

⁸Egamizning sharafiga hamdlar o‘qing! Nazrlar keltirib, Uning hovlisiga kiring!

⁹Muqaddas libosda [1] Egamizga sajda qiling! Ey zamin ahli, Uning oldida titrab turing!

¹⁰Elatlar orasida aytingki: “Egamiz shohdir! Olam mustahkam o‘rnashgan, hech qachon tebranmaydi, U xalqlarni haqqoniy hukm qilar.”

¹¹Samolar shod bo‘lsin, zamin quvonsin, Dengizu undagi hamma jonzot guvullasin.

¹²Dalalaru undagi har narsa sevinch ila jo‘shsin, Shunda o‘rmondagi hamma daraxt shodlikdan qo‘shiq aytsin.

¹³Egamiz oldida ular qo‘shiq aytar, ana, U kelayotir, Zaminni boshqarmoq uchun U kelayotir, Olamni adolat ila U boshqarar, Xalqlarni O‘z haqiqati ila boshqarar.