Read O‘zbek tilidagi Muqaddas Kitob, 2013 Zabur 96 Bible Online

Zabur 96 - O‘zbek tilidagi Muqaddas Kitob, 2013 bible

Zabur 96

¹Egamiz shohdir, zamin quvonsin, Dengiz ortidagi hamma yurtlar shod bo‘lsin.

²Bulutlar, zim–ziyo zulmat Uning atrofini o‘ragan, Adolatu haqiqat Uning taxtiga poydevor bo‘lgan.

³Egamiz olovini O‘zidan oldin yuboradi, Olovi har tarafdagi dushmanlarni yutadi.

⁴Chaqmoqlari olamni yoritadi, Zamin buni ko‘rib titraydi.

⁵Butun olamning Rabbiysi oldida, Egamiz oldida tog‘lar mumday eriydi.

⁶Samolar e’lon qiladi Uning adolatini, Jamiki xalqlar ko‘radi Uning ulug‘vorligini.

⁷Butlarga sajda qiluvchilar, Behuda sanamlari ila maqtanuvchilar Sharmanda bo‘ladi. Barcha xudolar Egamizga ta’zim qiladi.

⁸Ey Egam! Sening adolatingdan Yahudo shaharlari shod bo‘ladi, Quddus [1] eshitib, quvonadi.

⁹Ey Egam, yer yuzidagi buyuk hukmdor Sensan, Hamma xudolardan Sen yuksalgansan.

¹⁰Ey Egamizni sevganlar! Yomonlikdan nafratlaning. U taqvodorlarining jonlarini O‘zi asraydi, Fosiqlarning qo‘lidan ularni xalos etadi.

¹¹Solihlarga nur sochilgay, Yuragi poklar uzra shodlik yoyilgay.

¹²Ey solihlar, Egamiz tufayli shodlaning, Uning muqaddas nomini olqishlang!