Read O‘zbek tilidagi Muqaddas Kitob, 2013 Hikmatlar 1 Bible Online

Hikmatlar 1 - O‘zbek tilidagi Muqaddas Kitob, 2013 bible

Hikmatlar 1

¹Isroil shohi Dovud o‘g‘li Sulaymonning [1] Hikmatlari.

²Bu hikmatlar donolik va nasihatni o‘rgatadi, hikmatli so‘zlarni tushuntiradi,

³Aqlli ko‘rsatmalarga, to‘g‘rilik, adolat, odillikka ega qiladi,

⁴Soddalarga [2] idrok, yoshlarga bilim, fahmu farosat beradi.

⁵Donolar tinglab bilimini ko‘paytirsin, idrokli esa yo‘l–yo‘riq olsin.

⁶Bu hikmatlar — matallarni, jumboqlarni, dononing so‘zlarini va topishmoqlarini tushunish uchundir.

⁷Egamizdan qo‘rqish [3] ilmu ma’rifatning boshidir [4]. Donolik va nasihatdan nafratlangan esa nodondir [5].

⁸O‘g‘lim [6], otang nasihatlariga quloq sol, onang o‘gitlarini rad etma,

⁹Chunki ular boshingga go‘zal gulchambar, bo‘yningga marjondaydir.

¹⁰O‘g‘lim, agar gunohkorlar seni yo‘ldan urmoqchi bo‘lsa, bo‘yin berma.

¹¹Agar ular: “Kel, bizga qo‘shil, pistirma qo‘yib qon to‘kaylik, aybsizning yo‘lini vajsiz to‘saylik,

¹²do‘zaxga [7] o‘xshab uni tiriklayin o‘z qa’rimizga tortaylik, chuqur kabi butunlayin yutib yuboraylik,

¹³har xil boyliklarni tortib olib, uyimizni o‘lja bilan to‘ldiraylik,

¹⁴hamma narsa o‘rtada bo‘lsin, hamyonimiz bitta bo‘lsin”, — deb aytsalar,

¹⁵o‘g‘lim, ularning yo‘lidan yurma, bir qadam ham bosma.

¹⁶Chunki ular qon to‘kishga tayyordirlar, oyoqlari yovuzlikka shoshiladi.

¹⁷Qushlarning ko‘zi oldida to‘r qo‘yish foydasizdir.

¹⁸Yovuzlar o‘zlarining qoni to‘kilishini kutadilar, o‘zlarining jonlarini poylaydilar.

¹⁹Ochko‘zlik bilan tortib oladiganlarning ahvoli shu! Ular o‘z hayotiga zomin bo‘ladi.

²⁰Donolik [8] ko‘chada chaqiradi. Maydonda baland ovoz bilan hayqiradi.

²¹Gavjum ko‘chaning boshida, shahar darvozalarida [9] jar soladi.

²²“Ey, nodonlar, qachongacha nodon bo‘lib yuraverasiz?! Siz–chi, mazax qiluvchilar, qachongacha mazax qilishdan zavqlanasiz?! Aqlsizlar, qachongacha ilmu ma’rifatdan nafratlanasiz?!

²³Pand–nasihatlarimga quloq solinglar. Mana, sizlarga ruhimni beraman. So‘zlarimni ochaman.

²⁴Lekin sizlarni chaqirganimda rad etdingiz, qo‘llarimni uzatganimda, e’tibor bermadingiz.

²⁵Maslahat, pand–nasihatlarimning hech birini qabul qilmadingiz.

²⁶Shuning uchun boshingizga falokat kelganda, men ham kulaman. Vahimaga tushganingizda, mazax qilaman.

²⁷Vahima bo‘ronday, falokat esa to‘fonday kelganda, kulfatu mashaqqatlar boshga tushganda,

²⁸ular meni chaqiradilar, lekin javob bermayman. Ular meni qidiradilar, izlaydilar, lekin topolmaydilar.

²⁹Chunki ular ilm–ma’rifatdan nafratlandilar, Egamizdan qo‘rqishni tanlamadilar.

³⁰Maslahatlarimni, o‘gitlarimni qabul qilmadilar.

³¹Shuning uchun o‘z qilmishlarining mevasini yeb, pushaymon bo‘lib qoladilar.

³²Nodonlar yo‘ldan adashib o‘zini o‘ldiradi, aqlsizlarning beg‘amligi esa o‘zlarini halok qiladi.

³³Lekin menga quloq solganlar osoyishta hayot kechiradi, yomonlikning vahimasidan xalos bo‘ladi.”