Read O‘zbek tilidagi Muqaddas Kitob, 2013 Hikmatlar 10 Bible Online

Hikmatlar 10 - O‘zbek tilidagi Muqaddas Kitob, 2013 bible

Hikmatlar 10

¹Sulaymonning hikmatlari. Dono farzand otaga shodlik keltiradi, nodon farzand [1] esa onaga qayg‘u.

²Yovuzlik bilan topilgan boylikdan naf yo‘q, to‘g‘rilik esa o‘limdan qutqaradi.

³Egamiz solihning och qolishiga yo‘l qo‘ymaydi, lekin fosiqning xohishini bajo qilmaydi.

⁴Dangasa qo‘llar qashshoqlik keltiradi, tirishqoq qo‘llar esa boylik.

⁵Yoz paytida hosil yiqqan — dono o‘g‘il, o‘rim payti uxlagan esa otasiga uyat keltiradi.

⁶Solihning boshida — baraka, fosiqning tili esa yovuzlik konidir.

⁷Solihning xotirasi muborak bo‘ladi, fosiqning nomi yoddan ko‘tariladi.

⁸Yuragida donolik bo‘lgan amrlarni qabul qiladi, ezma nodon esa halok bo‘ladi.

⁹To‘g‘ri yurgan xavf–xatarni bilmaydi, yo‘ldan qayrilgan esa jazo topadi.

¹⁰Ko‘z qisgan qayg‘uga sabab bo‘ladi, ezma nodon halok bo‘ladi.

¹¹Solihning tili — hayot bulog‘i, fosiqning tili — yovuzlik koni.

¹²Nafrat janjal qo‘zg‘aydi, sevgi–muhabbat esa hamma gunohlarni berkitadi.

¹³Idroklining so‘zlarida — donolik, nodonning orqasida esa qamchi.

¹⁴Donolar bilimini orttiradi, nodonning tili esa halokat keltiradi.

¹⁵Boyning qal’asi — boyligi, kambag‘alning halokati esa kambag‘alligidadir.

¹⁶Solihning haqi — hayot, fosiqniki esa jazo.

¹⁷Nasihatga quloq solgan hayot yo‘lidadir, tanbehni tan olmagan yo‘ldan adashadi.

¹⁸Nafratini yashirgan — yolg‘onchi, g‘iybat tarqatuvchi esa ahmoqdir.

¹⁹Gap–so‘z ko‘p bo‘lsa, janjal hech qachon to‘xtamaydi, tilini tiygan esa donodir.

²⁰Solihning tili oltin kabidir, fosiqning qalbi esa hech narsaga arzimaydi.

²¹Solihning tili ko‘plarni oziqlantiradi, nodon esa aqlsizligi tufayli halok bo‘ladi.

²²Egamizning marhamati boylik keltiradi, U boylikka g‘am–tashvish qo‘shmaydi [2].

²³Ahmoq yomonlik qilishdan, aqlli esa donolikdan zavqlanadi.

²⁴Fosiq nimadan qo‘rqsa, o‘shanga duchor bo‘ladi, solih esa orzusiga yetishadi.

²⁵Quyundan keyin fosiqlar yo‘q bo‘ladi, solihlar esa abadiy mustahkamdir.

²⁶Dangasa unga ish buyurganlarga tishga qo‘yilgan sirka, ko‘zga kirgan tutun kabidir.

²⁷Egamizdan qo‘rqish [3] umrga umr qo‘shadi, fosiqning umri esa qisqaradi.

²⁸Solihning orzusi quvonch keltiradi, fosiqning niyati esa puchga chiqadi.

²⁹Egamizning yo‘li solihlar uchun qal’a, yomonlik qiladiganlar uchun esa halokatdir.

³⁰Solih hech qachon o‘rnidan qo‘zg‘atilmaydi, fosiq esa o‘sha yerda yashamaydi.

³¹Solihning tili donolik keltiradi, yomon til esa kesib tashlanadi.

³²Solihning tili marhamat keltiradi, fosiqning tili esa egrilik.