Read O‘zbek tilidagi Muqaddas Kitob, 2013 Hikmatlar 11 Bible Online

Hikmatlar 11 - O‘zbek tilidagi Muqaddas Kitob, 2013 bible

Hikmatlar 11

¹Yolg‘on tarozi Egamiz uchun jirkanchdir, aniq tarozi toshlari esa Uning quvonchidir.

²Mag‘rurlik bilan sharmandalik keladi, donolik esa kamtarlar bilandir.

³To‘g‘rilarning sofdilligi yo‘l ko‘rsatsa, xoinlarning ikkiyuzlamachiligi halok qiladi.

⁴Qiyomat kunida boylik foyda bermaydi, solihlik esa o‘limdan saqlaydi.

⁵Pokdilning solihligi yo‘lini to‘g‘rilaydi, fosiq esa fosiqligi tufayli qoqiladi.

⁶To‘g‘rining solihligi najot beradi, sotqin esa yomon niyatlari tufayli tutiladi.

⁷Yovuz o‘lsa, orzu–umidlari ham o‘ladi, fosiqning ham xohish–tilaklari poymol bo‘ladi.

⁸Solih g‘am–g‘ussadan qutuladi, fosiq esa g‘amga duchor bo‘ladi.

⁹Imonsiz tili bilan qo‘shnisini halok qiladi, solih esa ilm–ma’rifati tufayli najot topadi.

¹⁰Solihning ishi yurishsa, el–yurt quvonadi, fosiq halok bo‘lsa, tantana bo‘ladi.

¹¹To‘g‘ri odamlar tufayli shahar barakali bo‘ladi va yuksaladi, fosiqning tilidan esa el–yurt vayron bo‘ladi.

¹²Qo‘shnisini kamsitgan aqlsizdir, idrokli sukut saqlaydi.

¹³G‘iybatchi sirlarni ochadi, sodiq esa sir saqlaydi.

¹⁴Yo‘l–yo‘riq ko‘rsatuvchisi bo‘lmagan xalq halok bo‘ladi, maslahatchilar ko‘p bo‘lsa, g‘alaba keladi.

¹⁵Begonaga kafillik qilgan ko‘p jabr ko‘radi, kafil bo‘lishdan nafratlanadigan esa tinchgina yuradi.

¹⁶Mehribon xotin izzat–hurmat topadi, zo‘ravon esa boylik.

¹⁷Rahmdil o‘z joniga manfaat keltiradi, bag‘ritosh esa o‘ziga zarar yetkazadi.

¹⁸Solihlik tarqatadiganlar haqiqiy mukofot, fosiqlar esa yolg‘on mukofot oladilar.

¹⁹Solihlikni ko‘zlagan inson hayotga, yomonlikni ko‘zlagan esa o‘z o‘limiga erishadi.

²⁰Egri yurak Egamizga jirkanch, poklarning ishlari esa Uning quvonchidir.

²¹Fosiq albatta jazosiz qolmaydi, solihning esa avlodlari ham najot topadilar.

²²Chiroyli, ammo farosatsiz ayol, burniga tilla sirg‘a taqqan cho‘chqa misol.

²³Solihning xohishi faqat ezgulik, fosiqning kutganlari esa qahr–g‘azabdir.

²⁴Ba’zilarning qo‘li ochiq, ammo boyligi ko‘payaveradi. Ba’zilar lozim bo‘lganni berishga qizg‘ansa ham qashshoqlashaveradi.

²⁵Saxiyning biri ikki bo‘ladi, boshqalarga yaxshilik qilganning o‘zi ham yaxshilik ko‘radi.

²⁶G‘allasini qizg‘anganni xalq qarg‘aydi, sotganlarga esa baraka yog‘iladi.

²⁷Ezgulikka intilgan iltifot topadi, yomonlik qidirganga esa yomonlik keladi.

²⁸Boyligiga ishongan xonavayron bo‘ladi, solih esa barg kabi yashnaydi.

²⁹O‘z oilasiga g‘am–tashvish keltiradigan meros olmaydi, nodon esa donoga qul bo‘ladi.

³⁰Solihlarning mahsuli — hayot daraxti, oqilu donolar odamlarning yuragidan joy oladi.

³¹Dunyoda solih qancha taqdirlansa, fosiq bilan gunohkor undan ham ko‘proq jazolanadi.