Read O‘zbek tilidagi Muqaddas Kitob, 2013 Hikmatlar 12 Bible Online

Hikmatlar 12 - O‘zbek tilidagi Muqaddas Kitob, 2013 bible

Hikmatlar 12

¹Nasihatni sevgan ilm–ma’rifatni sevadi, tanbehdan nafratlanadigan esa ahmoqdir.

²Yaxshi odam Egamizning marhamatiga sazovor bo‘ladi, niyati buzuqni esa U jazoga hukm etadi.

³Inson yovuzlik bilan kamol topmaydi, solih hech qachon o‘rnidan qo‘zg‘atilmaydi.

⁴Yaxshi xotin erining boshidagi tojidir, erini uyaltiradigan xotin boshga balodir.

⁵Solihning fikri–zikri — adolat, fosiqning maslahati esa yolg‘ondir.

⁶Fosiqning so‘zi qonga tashna, to‘g‘rining tili esa qutqaradi.

⁷Fosiq halokatga uchrab yo‘q bo‘ladi, solihning uyi esa mustahkam turadi.

⁸Insonni aql–idrokiga qarab ulug‘laydilar, egri odam esa nafratga duchor bo‘ladi.

⁹O‘zini katta tutib nonga zor bo‘lgandan, oddiy bo‘lib xizmatkor bo‘lish yaxshiroq.

¹⁰Solih hayvonga ham mehribonlik qiladi, fosiqning rahmdilligi ham zolimlikdir.

¹¹Yerga ishlov bergan to‘yib non yeydi, bekor narsani ko‘zlagan esa aqlsizdir.

¹²Fosiq yovuzlik to‘riga ilintiray deydi, solihning ildizi yashnaydi.

¹³Fosiq tilining gunohi bilan tutiladi, solih esa g‘amdan forig‘ bo‘ladi.

¹⁴Odam so‘zlari tufayli yaxshi narsaga erishadi, mehnati uni taqdirlaydi.

¹⁵Nodon o‘z yo‘lini to‘g‘ri deb o‘ylaydi, dono esa maslahatga quloq soladi.

¹⁶Nodon g‘azabini darhol bildiradi, aqli raso esa haqoratlanganini berkitadi.

¹⁷To‘g‘ri gapiradigan haqiqatni aytadi, soxta guvoh yolg‘on gapiradi.

¹⁸O‘ylamasdan aytilgan so‘z qilichday jarohatlaydi, dononing gaplari esa shifo beradi.

¹⁹Rostgo‘y lablar abadiydir, yolg‘on til esa bir lahzalikdir.

²⁰Yomon niyat qiladiganning yuragida yolg‘on, tinchlik o‘rnatganda esa quvonch bor.

²¹Solihga hech qanday zarar tegmaydi, fosiq esa g‘am–g‘ussadan qutulmaydi.

²²Yolg‘onchi til Egamizga jirkanch, to‘g‘rilik bilan ish qiladiganlar esa Uning sevinchidir.

²³Aqlli bilimini ko‘z–ko‘z qilmaydi, nodon o‘z nodonligini oshkor qiladi.

²⁴Tirishqoq hukm suradi, dangasa esa qul bo‘ladi.

²⁵Yurakdagi qayg‘u–alam odamni ezadi, shirin so‘z esa yurakni shod etadi.

²⁶Solih o‘zgalarga yo‘l ko‘rsatadi [1], fosiq esa yo‘ldan adashtiradi.

²⁷Dangasa o‘ljasini pishirishga ham erinadi, g‘ayratli esa qimmatbaho boylikka ega bo‘ladi [2].

²⁸Solihlikning yo‘lida hayot, bu yo‘lda o‘lim yo‘qdir.