Read O‘zbek tilidagi Muqaddas Kitob, 2013 Hikmatlar 14 Bible Online

Hikmatlar 14 - O‘zbek tilidagi Muqaddas Kitob, 2013 bible

Hikmatlar 14

¹Dono xotin o‘z oilasini mustahkamlaydi, nodon xotin esa oilasini o‘zi buzadi.

²To‘g‘ri yo‘ldan yuradigan Egamizdan qo‘rqadi [1], egri yuradigan esa Uni rad etadi.

³Ahmoqning so‘zlari o‘ziga kaltak keltiradi, dononiki esa uni himoya qiladi.

⁴Ho‘kiz bo‘lmasa oxur toza, lekin ho‘kizning kuchi tufayli hosil ko‘p bo‘ladi.

⁵Sodiq guvoh yolg‘on gapirmaydi, soxta guvoh yolg‘on gapirishdan to‘xtamaydi.

⁶Mazax qiluvchi donolikni qidiradi, ammo topolmaydi, idrokliga esa bilim olish oson.

⁷Aqlsizdan uzoqlash, chunki undan ma’noli so‘z chiqmaydi.

⁸Ziyrakning donoligi o‘z yo‘lini bilishidadir, aqlsizning ahmoqligi esa uni yo‘ldan adashtiradi.

⁹Ahmoq ayb qurbonligi ustidan kuladi [2], to‘g‘ri odam esa Xudoning marhamatiga sazovor bo‘ladi.

¹⁰Yurak o‘z dardini o‘zi biladi, xursandligiga boshqalar kafillik berolmaydi.

¹¹Fosiqlarning uyi xaroba bo‘ladi, to‘g‘rilarning chodiri esa gullab–yashnaydi.

¹²Shunday yo‘l borki, insonga to‘g‘ri bo‘lib ko‘rinadi, ammo oxiri o‘limga olib boradi.

¹³Kulsa ham yurakda qayg‘u bor, xursandchilikning oxiri g‘amdir.

¹⁴Yuragi qing‘ir o‘z egriligidan, yaxshi odam esa to‘g‘riligidan mamnun.

¹⁵Sodda [3] har bir so‘zga ishonaveradi, aqlli esa qadamini o‘ylab bosadi.

¹⁶Dono qo‘rqib yomonlikdan uzoqlashadi, nodon esa jahli tez va beparvo [4].

¹⁷Badjahl aqlsizlik qiladi, badniyat esa nafratga uchraydi.

¹⁸Soddalarning nasibasi — nodonlik, aqllilarning toji esa ilmu ma’rifatdir.

¹⁹Yomonlar yaxshilarning oldida, fosiqlar esa solihlarning darvozasida ta’zim qiladi.

²⁰Kambag‘aldan qo‘shnilari ham nafratlanadi, boyning esa o‘rtoqlari ko‘p.

²¹Qo‘shnisini xor qilgan — gunohkor, muhtojga marhamat qilgan esa baxtlidir.

²²Niyati buzuqlar yo‘ldan adashmaydimi?! Yaxshi niyatlilar abadiy sevgiga sazovor bo‘ladi.

²³Har bir mehnatdan foyda bor, quruq gap esa kambag‘allik keltiradi.

²⁴Oqillarning toji — donoligi, aqlsizning nodonligi esa ahmoqligidir.

²⁵Rostgo‘y guvoh jonni qutqarsa, yolg‘onchi guvoh aldaydi.

²⁶Egamizdan qo‘rqish — mustahkam qal’a, farzandlariga ham O‘zi panohdir.

²⁷Egamizdan qo‘rqish hayot manbaidir, u o‘limdan qutqaradi.

²⁸Xalqining ko‘pligi — shohning shuhrati, kamligi esa hokimning halokatidir.

²⁹Sabr–toqatli odam aql–idroklidir, jahldorlik ahmoqlikni bildiradi.

³⁰Xotirjam yurak tanaga hayot baxsh etadi, hasadgo‘ylik esa suyaklarni chiritadi.

³¹Kambag‘alga zulm qilgan ularni Yaratganni tahqirlagan, muhtojga yordam bergan esa Xudoni ulug‘lagan bo‘ladi.

³²Fosiq o‘z qilmishlari tufayli halokatga uchraydi, solihga esa o‘limida ham panoh bor.

³³Donolik oqilning qalbida yashaydi, nodonlar orasida ham o‘zini bildiradi [5].

³⁴Solihlik xalqni yuksaltirsa, gunoh sharmanda qiladi.

³⁵Donolik bilan ish qiladigan qul shohning marhamatiga sazovordir, sharmandali ish qiladigan esa uning g‘azabiga uchraydi.