Read O‘zbek tilidagi Muqaddas Kitob, 2013 Hikmatlar 15 Bible Online

Hikmatlar 15 - O‘zbek tilidagi Muqaddas Kitob, 2013 bible

Hikmatlar 15

¹Yumshoq javob g‘azabni qaytaradi, qattiq so‘z esa jahl chiqaradi.

²Donolar tilidan ilm–hikmat yog‘ilsa, nodonlardan ahmoqlik chiqadi.

³Egamizning ko‘zlari hamma joyda, U yaxshiyu yomonni ko‘rib turadi.

⁴Shirin so‘z — hayot daraxti, buzuq til — jonning halokati.

⁵Ahmoq otasining nasihatini rad etadi, tanbehga quloq solgan esa idroklidir.

⁶Solihning uyida boylik ko‘p, fosiqning hosili esa tashvish keltiradi.

⁷Dononing tili bilim tarqatadi, ahmoqning qalbi esa unday emas.

⁸Fosiqning qurbonligi Egamizga jirkanchdir, to‘g‘rining ibodati esa Uning quvonchi.

⁹Fosiqning ishlari Egamizga jirkanchdir, solihlikka intilganni esa U sevadi.

¹⁰To‘g‘ri yo‘lni tashlab ketgan qattiq jazo oladi, tanbehdan nafratlangan esa o‘ladi.

¹¹Hatto O‘lim [1] va Halokat [2] ham Egamiz nigohi ostida ekan, odamzodning qalbi Unga hech narsa emas.

¹²Masxara qiluvchi tanbeh berganlarni yoqtirmaydi, u donolar oldiga ham bormaydi.

¹³Yurak shod bo‘lsa, chehra ochiq, g‘amgin bo‘lsa, ruh tushkundir.

¹⁴Zakovatli yurak ilm qidiradi, aqlsizning og‘zi ahmoqlik izlaydi.

¹⁵Qiynalganlarga har kun tashvish, lekin yuragida shodlik bo‘lsa, doimo bayram.

¹⁶Ko‘p boylikka ega bo‘lib vahima bilan yashagandan ko‘ra, Egamizdan qo‘rqib [3] ozgina boylik bilan yashash yaxshiroq.

¹⁷Go‘sht yeb nafrat bilan yashashdan, sabzavot yeb sevgi bilan yashagan afzalroq.

¹⁸Badjahl janjal chiqaradi, jahlni tiyadigan esa tinchlantiradi.

¹⁹Dangasaning yo‘li tikanli chetan devor kabi, to‘g‘rining so‘qmog‘i esa katta ravon yo‘ldir.

²⁰Aqlli farzand [4] otasini quvontiradi, aqlsiz esa onasini xor qiladi.

²¹Ahmoqlik vijdonsizga quvonchdir, aqlli esa to‘g‘ri yuradi.

²²Maslahat bo‘lmagan joyda ish yurishmaydi, maslahatchi ko‘p bo‘lsa, muvaffaqiyatli bo‘ladi.

²³Odam yaxshi javobi tufayli quvonadi, o‘z vaqtida aytilgan so‘z qanchalik yaxshi.

²⁴Donoga tepadagi hayot so‘qmog‘i pastdagi o‘liklar diyoridan uzoqlashish uchundir.

²⁵Egamiz takabburning uyini xonavayron qiladi, bevaning mol–mulkini saqlaydi.

²⁶Fosiqning niyatlari Egamizga jirkanch, yoqimli so‘zlar esa pokdir.

²⁷Ochko‘z o‘z uyiga tashvish keltiradi, poradan nafratlanadigan esa yashaydi.

²⁸Solih o‘ylab javob beradi, fosiqning og‘zidan esa yomonlik chiqaveradi.

²⁹Egamiz fosiqlardan uzoqda, lekin solihlarning ibodatini eshitadi.

³⁰Ko‘zdagi nur ko‘ngilni xushnud etadi, xushxabar esa tan–jonga oziq beradi.

³¹Hayotbaxsh nasihatga quloq solgan donolarning orasida bo‘ladi.

³²Nasihatni rad qilgan o‘z jonini xor qiladi, tanbehga quloq solgan esa idrokli bo‘ladi.

³³Egamizdan qo‘rqish donolikni o‘rgatadi, kamtarlik izzatu ikromdan oldinda.