Read O‘zbek tilidagi Muqaddas Kitob, 2013 Hikmatlar 16 Bible Online

Hikmatlar 16 - O‘zbek tilidagi Muqaddas Kitob, 2013 bible

Hikmatlar 16

¹Rejalar odamning yuragida, tildagi javob esa Egamizdan.

²Odamning qilmishlari uning nazarida to‘g‘ri, lekin Egamiz yurakning pokligini o‘lchaydi.

³Ishlaringni Egamizga topshir, shunda rejalaring mustahkam bo‘ladi.

⁴Hamma narsani Egamiz o‘z maqsadi bilan yaratdi, hatto fosiqlar ham kulfat kuni uchun yaralgan.

⁵Barcha takabburlar Egamizga jirkanch, ular jazosiz qolmaydilar.

⁶Abadiy sevgi tufayli gunoh kechiriladi, Egamizdan qo‘rqish [1] yomonlikdan uzoqlashtiradi.

⁷Egamizga insonning yo‘llari ma’qul kelganda, dushmanlari bilan ham yarashtiradi.

⁸Adolatsiz kelgan ko‘p daromaddan, halol mehnat bilan topilgan ozginasi yaxshiroq.

⁹Odam yuragida niyat qiladi, Egamiz esa uning yo‘lini mustahkamlaydi.

¹⁰Xudoning so‘zlari shohning tilida, hukm qilganda xato qilmaydi.

¹¹To‘g‘ri taroziyu pallalar Egamiznikidir, tarozi toshlarini ham Xudo yaratgan.

¹²Shohning yomonlik qilishi qabihlikdir [2], chunki uning taxti adolat tufayli mustahkam.

¹³To‘g‘ri so‘z shohning quvonchidir, u rostgo‘ylarni yaxshi ko‘radi.

¹⁴Shohning g‘azabi o‘lim darakchisidir, dono uni tinchlantiradi.

¹⁵Shoh yuzidagi tabassum hayotdan nishona, Uning marhamati esa yomg‘ir keltiradigan bulut kabidir.

¹⁶Dono bo‘lish — oltindan, idrok topish esa kumushdan ham yaxshiroqdir.

¹⁷To‘g‘rining yo‘li yomonlikdan uzoqlashtiradi, yo‘lini qo‘riqlagan esa o‘z jonini asraydi.

¹⁸Mag‘rurlikning ortidan halokat keladi, takabburlikdan so‘ng esa odam qoqiladi.

¹⁹Takabburlar bilan o‘lja bo‘lishgandan ko‘ra, kamtarin bo‘lib kambag‘allar orasida bo‘lish yaxshiroq.

²⁰Gapga tushunadigan yaxshilik topadi, Egamizga umid bog‘lagan baxtli bo‘ladi.

²¹Qalbida donolik bo‘lgan farosatli deb ataladi, shirinsuxanlik aql–idrokni ko‘paytiradi.

²²Idrok o‘zining sohibi uchun hayot bulog‘i, ahmoqlik esa ahmoqqa jazodir.

²³Dononing yuragi tiliga idrok beradi, so‘zlarini ishonchli qiladi.

²⁴Yoqimli so‘z asal kabidir, jonga rohat, suyaklarga malhamdir.

²⁵Shunday yo‘l borki, insonga to‘g‘ri bo‘lib ko‘rinadi, ammo oxiri o‘limga olib boradi.

²⁶Mehnat qiladigan odam o‘zi uchun ishlaydi, chunki och qorni uni undaydi.

²⁷Fosiq yomonlikni qo‘zg‘aydi, so‘zlari kuydiradigan olov kabidir.

²⁸Makkor janjal chiqaradi, g‘iybatchi esa yaqin do‘stlarni ajratadi.

²⁹Yovuz o‘zgani aldab, yomon yo‘lga boshlaydi.

³⁰Ko‘zini qisgan — yomon niyatda, labini tishlagan esa yovuzlik qilgan.

³¹Oqargan sochlar — sharofat toji, solihlik yo‘lida yurgan unga erishadi.

³²Jahlini tiygan — qudratlidan, o‘zini tuta biladigan esa shaharni yenggandan yaxshiroq.

³³Qur’a tashlanadi [3], ammo barcha qaror Egamizdandir.