Read O‘zbek tilidagi Muqaddas Kitob, 2013 Hikmatlar 17 Bible Online

Hikmatlar 17 - O‘zbek tilidagi Muqaddas Kitob, 2013 bible

Hikmatlar 17

¹Dasturxoni to‘la janjalli uydan, bir tishlam qattiq noni bor tinch xonadon yaxshiroq.

²Sharmandali ish qiladigan o‘g‘il ustidan farosatli qul hukmronlik qiladi, u aka–ukalar qatori merosga sherik bo‘ladi.

³Kumush, oltin olovda sinaladi, odamlarning qalbini esa Egamiz sinaydi.

⁴Fosiqlar yovuz odamlarning gapiga kiradi, yolg‘onchi esa g‘iybatga quloq soladi.

⁵Kambag‘alni mazax qilgan ularni Yaratganni tahqirlaydi, qiyinchilikda quvonadigan jazosiz qolmaydi.

⁶Nabiralar — keksalarning toju taxti, o‘g‘illarning shon–shuhrati otalaridir.

⁷Yaxshi so‘z nodonga yarashmagandek, yolg‘onchilik ulug‘sifat odamga aslo to‘g‘ri kelmaydi.

⁸Pora egasining nazarida sehrli qimmatbaho tosh, go‘yo hamma yerda omad keltiradi.

⁹Gunohni berkitgan do‘stlikni saqlaydi, uni kavlashtirgan esa do‘stni uzoqlashtiradi.

¹⁰Donoga berilgan bitta tanbeh nodonning boshida singan yuzta kaltakdan ta’sirliroq.

¹¹Fosiq faqat g‘alayon payida bo‘ladi, shuning uchun unga yovuz elchi yuboriladi.

¹²Tentakning ahmoqligiga yo‘liqqandan ko‘ra, bolalaridan ayrilgan ona ayiqqa duch kelgan yaxshiroq.

¹³Yaxshilikka yomonlik qilganning xonadonidan yomonlik arimaydi.

¹⁴Janjalning boshlanishi — suv urib ketishiday, chiqmay turib uni to‘xtat.

¹⁵Fosiqni oqlash, solihni ayblash — ikkovi ham Egamizga jirkanchdir.

¹⁶Bu nima?! Nodonning qo‘lida boylik bor, “Donolik sotib olay”, — deydi, lekin unda aql yo‘q.

¹⁷Do‘st har qachon sevish uchundir, aka–ukalar ham og‘ir kun uchun tug‘ilgan.

¹⁸Qo‘l tashlab birovga kafillik qiladigan aqlsizdir [1].

¹⁹Gunohni yaxshi ko‘rgan urush–janjalni sevar, o‘ziga bino qo‘ygan [2] halokat qidirar.

²⁰Makkor yurakli yaxshilikka erishmaydi, egri til esa kulfatga duchor bo‘ladi.

²¹Nodon farzandli bo‘lish qayg‘u keltiradi, ahmoqning otasi esa shodlik nimaligini bilmaydi.

²²Shod yurak — shifobaxsh dori, g‘am–kulfat esa jonning egovidir.

²³Fosiq qo‘ynidan pora olib adolat yo‘lini o‘zgartiradi.

²⁴Fahm–farosatli inson donolikka qaraydi, nodonning ko‘zi esa dunyoning narigi chetida.

²⁵Ahmoq farzand [3] — otasiga qayg‘u, uni tuqqan onaga esa g‘amdir.

²⁶Solihni jazolash, amaldorni odilligi uchun koyish yaxshi emas.

²⁷Kam gapirgan — dono, og‘ir, vazmin esa idroklidir.

²⁸Ahmoq ham indamay o‘tirsa dono, tilini tiygan esa farosatli hisoblanadi.