Read O‘zbek tilidagi Muqaddas Kitob, 2013 Hikmatlar 19 Bible Online

Hikmatlar 19 - O‘zbek tilidagi Muqaddas Kitob, 2013 bible

Hikmatlar 19

¹To‘g‘ri yuradigan kambag‘al egri tilli ahmoqdan yaxshiroq.

²Bilimsiz istak yaxshi emas, shoshqaloqlar esa qoqiladi.

³Nodonning nodonligi hayotini buzadi–yu, Egamizdan jahli chiqadi.

⁴Boylik do‘stlar ustiga do‘st keltiradi, kambag‘al esa do‘stidan ham ayriladi.

⁵Soxta guvoh jazosiz qolmaydi, yolg‘on gapiruvchi esa qochib qutulmaydi.

⁶A’yonlarning marhamatini istaydigan ko‘p, sovg‘a beruvchiga esa hamma do‘stdir.

⁷Kambag‘aldan hamma aka–ukalari nafratlanadi, do‘stlari ham uzoqlashadi, qidirganda ularning izi ham yo‘q.

⁸Donolikka erishgan o‘z jonini sevadi, farosatli bo‘lgan esa yaxshilik topadi.

⁹Soxta guvoh jazosiz qolmaydi, yolg‘onchi halok bo‘ladi.

¹⁰Hashamatli yashash ahmoqqa yarashmaganidek, xo‘jayin ustidan hokimlik qilish qulga ham to‘g‘ri kelmaydi.

¹¹Odamning aqli jahlini tiyadi, gunohni kechirish unga shuhrat keltiradi.

¹²Shohning g‘azabi sherning o‘kirishiga o‘xshaydi, muruvvati esa maysadagi shabnam kabidir.

¹³Nodon o‘g‘il otasiga tashvish, xotinning janjali esa beto‘xtov tomadigan tomchidaydir.

¹⁴Uy va boylik — otadan meros, farosatli xotin esa Egamizdandir.

¹⁵Dangasalik odamni uyquchi qiladi, yalqov esa och qoladi.

¹⁶Amrlarga amal qilgan o‘z jonini asraydi, o‘z hayotini xor qilgan esa o‘ladi.

¹⁷Kambag‘alga rahm qilish — Egamizga qarz berishday, U yaxshilikni qaytaradi.

¹⁸Umid bor ekan, farzandingni [1] tarbiya qil, buzilib, nobud bo‘lishiga yo‘l qo‘yma.

¹⁹Jahldor jazosini oladi, uni bir qutqarsang yana qutqarishingga to‘g‘ri keladi.

²⁰Nasihatga quloq sol, pand–o‘gitni qabul qil, shunda umring bo‘yi oqil bo‘lasan.

²¹Insonning yuragida niyat ko‘p, lekin faqat Egamizning aytgani amalga oshadi.

²²Insonning istagi — sadoqatli sevgi, kambag‘al yolg‘onchidan yaxshiroqdir.

²³Egamizdan qo‘rqish [2] hayotga eltadi, odam huzur–halovatda yashab tashvishga uchramaydi.

²⁴Dangasa qo‘lini kosaga cho‘zadi–yu, og‘ziga olib kelishga erinadi.

²⁵Mazax qiluvchini urish! Shunda sodda [3] odamlarga aql kiradi. Farosatliga tanbeh bersang, bilimi oshadi.

²⁶Otasiga zo‘ravonlik qilib, onasini haydagan o‘g‘il uyat va sharmandalik keltiradi.

²⁷Ey, o‘g‘lim [4], agar nasihatga quloq tutmasang, ilm–ma’rifatdan yuz o‘girgan bo‘lasan.

²⁸Makkor guvoh adolat ustidan kuladi, fosiqning og‘zi yovuzlikni o‘ziga oladi.

²⁹Mazax qiluvchilarga hukm, nodonlarga esa kaltak tayyordir.