Read O‘zbek tilidagi Muqaddas Kitob, 2013 Hikmatlar 2 Bible Online

Hikmatlar 2 - O‘zbek tilidagi Muqaddas Kitob, 2013 bible

Hikmatlar 2

¹O‘g‘lim [1], nasihatlarimni qabul qilib, amrlarimni yuragingda saqlasang,

²Donolikka quloq solib, qalbingni fahm–idrokka ochsang,

³Farosatga tashna, idrokka chanqoq bo‘lsang,

⁴Uni kumush izlaganday izlasang, yashirin xazina qidirganday qidirsang,

⁵Egamizdan qo‘rqish [2] nimaligini tushunasan, Xudo kimligini bilasan.

⁶Chunki donolikni Egamiz beradi, bilim va idrok Uning og‘zidan chiqadi.

⁷U to‘g‘ri odam uchun najot saqlaydi, to‘g‘ri yuradiganga O‘zi qalqon bo‘ladi.

⁸Adolatli insonni himoya qiladi, Unga sodiq bo‘lganning yo‘lini qo‘riqlaydi.

⁹Shunda sen to‘g‘rilik, adolat, odillik, ya’ni to‘g‘ri yo‘l nima ekanligini tushunasan.

¹⁰Chunki yuragingga donolik kiradi, ruhing esa bilimdan zavqlanadi.

¹¹Fahm–farosat seni himoya qiladi, aql–idrok esa qo‘riqlaydi.

¹²Yomon yo‘ldan, yovuz gapiradiganlardan asraydi.

¹³Ular to‘g‘ri yo‘lni tashlab, qorong‘ilikda yuradi.

¹⁴Yomon ishlardan xursand bo‘ladi, yovuzlikdan quvonadi.

¹⁵Ular yo‘ldan adashgan, so‘qmoqlari esa egridir.

¹⁶Seni zinokordan, tilyog‘lama buzuq ayoldan saqlasin.

¹⁷U yoshligidagi umr yo‘ldoshini tashlab, Xudo oldida bergan ahdini buzgan.

¹⁸Uning uyi o‘limga [3], yo‘llari esa o‘liklarning oldiga olib boradi.

¹⁹Uning oldiga borgan qaytib kelmaydi, hayot so‘qmoqlariga yetmaydi.

²⁰Shuning uchun yaxshi odamlarning yo‘lidan yurgin, solihlarning yo‘lidan chiqmagin.

²¹Chunki to‘g‘ri odam o‘sha yerda yashaydi, pok odam u yerda qoladi.

²²Fosiq esa yerdan qirib tashlanadi, vafosiz yo‘q qilinadi.