Read O‘zbek tilidagi Muqaddas Kitob, 2013 Hikmatlar 20 Bible Online

Hikmatlar 20 - O‘zbek tilidagi Muqaddas Kitob, 2013 bible

Hikmatlar 20

¹Sharob — mazaxchi, aroq — janjalkash, ularga aldanganlar nodondir.

²Shohning g‘azabi — sherning o‘kirishiday, jahlini chiqargan jonini yo‘qotadi.

³Janjaldan o‘zini tortish — insonning hurmati, ahmoq esa janjalga aralashadi.

⁴Dangasa kuzda [1] yer haydamaydi, o‘rim payti esa qidirib hech narsa topolmaydi.

⁵Insonning fikrlari — chuqur suv kabidir, fahmli odam tashqariga chiqara oladi.

⁶Ko‘pchilik o‘zini sodiq deb aytadi, haqiqatan ham sadoqatli bo‘lganni topib ko‘r–chi!

⁷Solih halol yashaydi, uning bolalari naqadar baxtlidir!

⁸Hukmronlik qilayotgan shoh o‘z ko‘zi bilan barcha yomonliklarni ajratadi.

⁹“Qalbimni tozaladim, gunohimdan xoliman”, deb kim ayta oladi?!

¹⁰Ikki turli tarozi toshi va noto‘g‘ri o‘lchov — ikkovi ham Egamizga jirkanchdir.

¹¹Hatto yosh bolani ham xulqidan, to‘g‘ri yo pokligini ishlaridan bilsa bo‘ladi.

¹²Eshitadigan quloq, ko‘radigan ko‘z — ikkovini ham Egamiz yaratgan.

¹³Uyquni yaxshi ko‘rma, bo‘lmasa kambag‘al bo‘lasan, ko‘zlaringni och, qorning to‘yadi.

¹⁴Xaridor: “Yaxshi emas, yaxshi emas!” — deydi–yu, nariroqqa borib maqtanadi.

¹⁵Oltin bor, yoqut toshlar ham ko‘p, biroq eng qimmatbaho narsa — bilimli til.

¹⁶Begonaga kafillik qilganning [2] kiyimini yechib ol, chet ellikdan esa garov ol.

¹⁷Nohaqlik bilan topilgan non shirin, ammo keyin og‘iz tuproq bilan to‘ladi.

¹⁸Maslahat bilan reja tuz, aqlli yo‘l–yo‘riq bilan urush olib bor.

¹⁹Chaqimchi sirlarni ochadi, og‘zi bo‘sh odam bilan aloqada bo‘lma.

²⁰Kim ota–onasini la’natlasa, uning chirog‘i zulmatda o‘chib qoladi.

²¹Boshida shoshilib olingan meros oxirida barakali bo‘lmaydi.

²²Yovuzlik uchun qasos olaman demagin, Egamizga umid bog‘lab kutgin, U seni qutqaradi.

²³Ikki xil tarozi toshi Egamizga jirkanchdir, yolg‘on tarozi ham yaxshi emas.

²⁴Insonning qadami — Egamizdan, shunday ekan, u o‘z yo‘lini qanday tushunsin?!

²⁵O‘ylamasdan Xudoga va’da bergan kishi, ahd qilgandan keyin ikkilangan odam tuzoqdadir.

²⁶Dono shoh yovuzlarni ajratib, ularning ustidan tegirmon toshi yurgizadi.

²⁷Odamning ruhi — Egamizning chirog‘i, vujudning barcha chuqurliklarini tekshirib turadi.

²⁸Abadiy sevgi shohni asraydi, o‘sha inoyat tufayli uning taxti mustahkamdir.

²⁹Yigitning g‘ururi quvvatida, oqargan sochlar esa keksaning shuhratidir.

³⁰Qamchining jarohati yomonlikka davodir, kaltak zarbi vujudning eng chuqur joylarini tozalaydi.