Read O‘zbek tilidagi Muqaddas Kitob, 2013 Hikmatlar 21 Bible Online

Hikmatlar 21 - O‘zbek tilidagi Muqaddas Kitob, 2013 bible

Hikmatlar 21

¹Shohning yuragi Egamizning qo‘lida, uni irmoqday xohlagan tomonga buradi.

²Odamning qilmishlari o‘zining nazarida to‘g‘ri, ammo Egamiz yuraklarni sinaydi.

³Adolatu haqiqatga amal qilish Egamizga qurbonlikdan afzalroqdir.

⁴Takabbur ko‘zlar va mag‘rur yurak chiroq kabi fosiqning gunohini ko‘rsatadi.

⁵Mehnatkashning rejasi faqat mo‘l–ko‘lchilik keltiradi, shoshqaloq kambag‘allikka uchraydi.

⁶Yolg‘on bilan boylik topadiganlar chiqib ketadigan bug‘ kabidir, o‘z o‘limini izlaydi.

⁷Yovuzning zo‘ravonligi boshiga yetadi, chunki adolat bilan ish qilishni rad etadi.

⁸Gunohkorning yo‘li — egri, sofdilning ishi — to‘g‘ri.

⁹Urishqoq xotin bilan keng uyda umr kechirgandan ko‘ra, chordoqda yashagan afzal.

¹⁰Yovuzning ko‘ngli yomonlikka tashna, qo‘shnisi undan rahm–shafqat topmaydi.

¹¹Mazax qiluvchi jazolansa, sodda [1] odamlar dono bo‘ladi, donoga yo‘l–yo‘riq berilsa, bilimi oshadi.

¹²Xudo odildir, fosiqning uyini U kuzatib turadi, u fosiqni halokatga mubtalo qiladi.

¹³Kambag‘alning yig‘isiga kim quloq solmasa, o‘zi yig‘laganda ham hech kim javob bermaydi.

¹⁴Yashirincha berilgan sovg‘a jahlni yumshatadi, yeng ichidagi pora esa qattiq g‘azabni.

¹⁵Adolatga amal qilish solihlarga sevinch, fosiqlarga esa qo‘rqinchdir.

¹⁶Aql–idrok yo‘lidan chiqqanlar o‘liklar orasidadir.

¹⁷Ziyofatni sevgan qashshoqlashadi, sharob bilan moyni yaxshi ko‘rgan odam boy bo‘lmaydi.

¹⁸Fosiq solihdan, xoin esa to‘g‘ri kishilardan ko‘ra, ko‘proq azob chekadi.

¹⁹Urishqoq va badjahl xotin bilan yashagandan ko‘ra, cho‘lu biyobonda yashash yaxshiroq.

²⁰Dononing uyida yog‘ ham, eng yaxshi narsalar ham bor, aqlsiz esa uni sarflab yuboradi.

²¹To‘g‘rilik va inoyat payida bo‘lganlar uzoq umr, solihlik va shon–shuhratga erishadi.

²²Dono eng qudratli shaharga borib, tayanch bo‘lgan qal’ani ham vayron qiladi.

²³Og‘zini va tilini qo‘riqlagan o‘z jonini tashvishlardan asraydi.

²⁴Takabbur va mag‘rurning nomi “mazaxchi”, hamma narsani manmanlik bilan qiladi.

²⁵Dangasaning orzusi o‘limga olib keladi, chunki qo‘llari ishga bormaydi.

²⁶Dangasaning kuni badnafslik bilan o‘tadi, solih esa ayamasdan beradi.

²⁷Fosiqlarning qurbonligi jirkanchdir, yovuz niyat bilan keltirilgani esa undan ham battar.

²⁸Soxta guvoh yo‘q bo‘ladi, haqiqatga quloq solgan esa qoladi.

²⁹Fosiqning yuzi qattiq, to‘g‘ri odam esa o‘z yo‘lini biladi.

³⁰Egamizga qarshi donolik ham, idrok ham, reja ham yo‘q.

³¹Ot jang kuni uchun tayyorlanadi, g‘alaba esa Egamizning qo‘lida.