Read O‘zbek tilidagi Muqaddas Kitob, 2013 Hikmatlar 22 Bible Online

Hikmatlar 22 - O‘zbek tilidagi Muqaddas Kitob, 2013 bible

Hikmatlar 22

¹Yaxshi nom — eng katta boylikdan ortiq, marhamatga sazovor bo‘lish esa kumushu oltindan ham yaxshi.

²Boy bilan kambag‘alning bir o‘xshashligi bor, ikkovini ham Egamiz yaratgan.

³Es–hushli xavf–xatarni ko‘rib yashirinadi, sodda [1] esa to‘xtamasdan boraveradi, shuning uchun qiynaladi.

⁴Kamtarlik va Egamizdan qo‘rqish [2] boylik, hurmat va hayot keltiradi.

⁵Egrining yo‘lida tikanzor va tuzoqlar bor, o‘z jonini asragan undan uzoqlashadi.

⁶Bolani to‘g‘ri yo‘lga solib tarbiyala, shunda qariganda ham yo‘lidan adashmaydi.

⁷Boylar kambag‘allar ustidan hukmronlik qiladi, qarzdor esa qarz berganning qulidir.

⁸Fosiqlikni ekkan tashvish yig‘adi, jahl qamchisi esa sinadi.

⁹Saxiy baraka topadi, chunki o‘z nonini kambag‘allar bilan baham ko‘radi.

¹⁰Mazax qiluvchini oradan quv! Shunda g‘avg‘o ketadi, janjalu haqorat ham barham topadi.

¹¹Pokdillikni sevib, xushmuomala bo‘lganga shoh do‘st bo‘ladi.

¹²Egamiz ilm–ma’rifatli insonni asraydi, U xoinning so‘zlarini puchga chiqaradi.

¹³Dangasa: “Tashqarida sher bor, ko‘chada meni o‘ldiradi”, — deydi.

¹⁴Buzuq ayolning og‘zi tubsiz chohdir, Egamizning g‘azabiga uchraganlar unga tushadi.

¹⁵Aqlsizlik bolaning diliga o‘rnashgan, tanbeh qamchisi uni ajratib yuboradi.

¹⁶Boy bo‘laman deb qashshoqni ezgan ham, boyga sovg‘a qilgan ham kambag‘allashadi.

¹⁷Donolarning so‘zlariga quloq tut, qalbingni bilimimga och.

¹⁸Chunki bu so‘zlarni qalbingda saqlasang, diling yashnaydi, ular doim tilingda tayyor bo‘lsin.

¹⁹Egamizga umid bog‘lagin deb bugun shularni o‘rgatyapman.

²⁰Senga bilim va maslahat bilan o‘ttizta nasihat yozib bermaganmidim?!

²¹Bu haqiqat so‘zlarini o‘rganib, seni yuborganlarga aytib berishing uchun edi.

²²Kambag‘aldan kambag‘alligi uchun o‘g‘irlama, baxtsizni darvoza oldida hukm qilganda qiynama.

²³Chunki Egamiz himoya qilib, ulardan olganning jonini oladi.

²⁴Urishqoq bilan do‘stlashma, badjahl bilan yurma.

²⁵Bo‘lmasa sen ham ularning yo‘liga tushib qolasan, joningni tuzoqqa ilintirasan.

²⁶Begona bilan qo‘l tashlashma, o‘zganing qarziga kafillik beradiganlarning birisi bo‘lma [3].

²⁷To‘lash uchun hech narsang bo‘lmasa, nega tagingdagi to‘shagingni olib ketishi kerak?!

²⁸Ota–bobolaring qo‘ygan qadimiy chegaralarni buzma [4].

²⁹O‘z ishiga mohir ustani ko‘rganmisan? U oddiy odamlarga emas, shohga xizmat qiladi.