Read O‘zbek tilidagi Muqaddas Kitob, 2013 Hikmatlar 23 Bible Online

Hikmatlar 23 - O‘zbek tilidagi Muqaddas Kitob, 2013 bible

Hikmatlar 23

¹Hokim bilan ovqatlanishga o‘tirganda, oldingga qo‘yilgan narsalarga nazar sol.

²Agar ishtahang katta bo‘lsa, bo‘g‘zingga pichoq qo‘y.

³Uning ne’matlarini ko‘ngling tusamasin, chunki u aldaydigan taomdir.

⁴Boy bo‘lay deb ko‘p harakat qilma, fahmu farosat bilan bu fikringdan voz kech.

⁵Boylik ko‘z ochib–yumguncha yo‘q bo‘ladi, qanot qoqib burgutday osmonga uchib ketadi.

⁶Xasisning ovqatidan yema, uning ne’matlarini ko‘ngling tusamasin.

⁷Chunki u ko‘nglida o‘zining foydasini hisoblaydi [1], “Yegin, ichgin”, — deydi–yu, ko‘ngli sen bilan emas.

⁸Yegan luqmangni qayt qilasan, shirin so‘zlaring havoga uchib ketadi.

⁹Ahmoqqa gap gapirma, hikmatli so‘zlaringni rad etadi.

¹⁰Qadimiy chegaralarni buzma [2], yetimlarning dalasini tortib olma.

¹¹Chunki ularning Himoyachisi qudratli, U yetimlarning tarafini oladi.

¹²Yuragingni nasihatga, quloqlaringni esa idrok so‘zlariga och.

¹³Boladan tanbehni ayama, chunki tayoq bilan ursang o‘lmaydi.

¹⁴Tayoq bilan urib jazolasang, jonini do‘zaxdan [3] saqlaysan.

¹⁵O‘g‘lim [4], qalbingda donolik bo‘lsa, yuragim quvonadi.

¹⁶Tilingdan to‘g‘ri so‘z chiqsa, ko‘nglim ham shodlanadi.

¹⁷Gunohkorlarga havas qilma, doim Egamizdan qo‘rqib [5] yur.

¹⁸Chunki albatta kelajak bor, umiding ro‘yobga chiqadi.

¹⁹O‘g‘lim, tinglab dono bo‘l, yuragingni to‘g‘ri yo‘lga sol.

²⁰Mayxo‘r va ochko‘zlik bilan go‘sht yeydiganlar orasida bo‘lma.

²¹Chunki mayxo‘r va ochko‘z qashshoq bo‘ladi, uyquchilik esa juldur kiyim kiydiradi.

²²Seni dunyoga keltirgan otangga quloq sol, onang qariganda xor qilma.

²³Haqiqatni sotib ol, donolik, yo‘l–yo‘riq, idrok ham ol, ularni sotma.

²⁴Solih otasining boshini ko‘kka yetkazadi, dono farzand [6] uni xursand qiladi.

²⁵Ota–onang sendan xursand bo‘lsin, senga hayot bergan onang shod bo‘lsin.

²⁶O‘g‘lim, menga qalbingni och, ko‘zlaring ishlarimni kuzatsin.

²⁷Chunki buzuq xotin — tubsiz choh, zinokor xotin tor quduqdir.

²⁸U qaroqchi kabi poylab turadi, odamlar orasida vafosizlikni orttiradi.

²⁹Qayg‘u kimda, kim g‘am–tashvish tortadi, kim janjal qiladi, shikoyat qilgan kim? Kim sababsiz yaralanadi? Kimning ko‘zlari qip–qizil?

³⁰Sharob ichishga berilganlar, xush hidli mayni totib ko‘rishga ko‘p borgan.

³¹Sharobning qizilligiga, qadahda cho‘g‘day tovlanishiga, tekis quyilishiga qarama.

³²Oxirida u ilon kabi chaqadi, qora ilonday zahar sochadi.

³³Ko‘zlaring g‘alati narsalarni ko‘radi, yuragingda egri fikrlar bo‘ladi.

³⁴Dengiz o‘rtasida yotganday, kema ustunida uxlaganday bo‘lasan.

³⁵“Meni urdilar, og‘rimadi, kaltakladilar, lekin bilmadim. Qachon uyg‘onaman?! Yana bir ichay”, — deysan.