Read O‘zbek tilidagi Muqaddas Kitob, 2013 Hikmatlar 24 Bible Online

Hikmatlar 24 - O‘zbek tilidagi Muqaddas Kitob, 2013 bible

Hikmatlar 24

¹Fosiqlarga havas qilma, ular bilan birga bo‘lishga intilma.

²Chunki ular zo‘ravonlikni niyat qiladi, tillari esa yomonlikni gapiradi.

³Uy donolik bilan quriladi, idrok bilan mustahkam bo‘ladi.

⁴Xonalar esa bilim bilan turli qimmatbaho, qimmatli boylikka to‘ladi.

⁵Dono sipohlar kuchli sipohlardan [1], ilm–ma’rifatlilar esa kuchi borlardan qudratliroqdir.

⁶Yaxshi odam yo‘l–yo‘riq bilan urushga boradi, maslahatchilar ko‘pligi tufayli g‘alaba qiladi.

⁷Ahmoq donolikka yetishmaydi, hukmda og‘zini ocha olmaydi.

⁸Yomon niyat qiluvchining nomi shakkokdir.

⁹Ahmoqlik bilan tuzilgan reja gunohdir, mazaxchidan odamlar jirkanadi.

¹⁰Tashvishli kunda ojiz bo‘lganning kuchi kamdir.

¹¹O‘limga mahkum bo‘lganlarni, dorga olib ketilayotganlarni qutqar.

¹²“Bilmayman”, — desang ham, yurakni sinaydigan Xudo ko‘rmaydimi, jonni asraydigan buni bilmaydimi? Hammaga ularning ishiga yarasha qaytarmaydimi?

¹³O‘g‘lim [2], asal yeb ko‘rgin, u yaxshi, asalari mumi og‘zingga shirindir.

¹⁴Donolik joningga asaldaydir, unga erishsang kelajagingni topasan, umiding ro‘yobga chiqadi.

¹⁵Ey, fosiq, solihning uyiga pistirma qurma, uy–joyiga tegma.

¹⁶Solih yetti marta yiqilsa ham turib ketaveradi, fosiq esa halokatga uchraydi.

¹⁷Dushmaning yiqilganda sevinma, qoqilgani uchun yuraging quvonmasin.

¹⁸Bo‘lmasa Egamiz buni ko‘rib yoqtirmay, g‘azabini undan o‘giradi.

¹⁹Fosiqlardan jahling chiqmasin, yomonlarga havas qilma.

²⁰Chunki yomonlarning kelajagi yo‘q, fosiqlarning chirog‘i esa o‘chib qoladi.

²¹Ey, o‘g‘lim, Egamizdan ham, shohdan ham qo‘rq, ularga qarshi bosh ko‘tarma [3].

²²Chunki ulardan kulfat kutilmaganda keladi, ikkovidan keladigan halokatni kim biladi?!

²³Quyidagi so‘zlar ham donolardan. Hukmda tarafgarchilik qilish yaxshi emas.

²⁴Fosiqqa “solihsan” deganni el la’natlaydi, xalqlar undan nafratlanadi.

²⁵Unga tanbeh berganlardan xursand bo‘ladi, ular qut–baraka topadilar.

²⁶To‘g‘ri javob beradiganlarni esa hamma sevadi.

²⁷Tashqaridagi yumushingni bajar, daladagi barcha ishlaringni tartibga sol, keyin uyingni qurgin.

²⁸Sababsiz o‘zgaga qarshi guvohlik berma, tiling bilan aldama.

²⁹“Menga nima qilgan bo‘lsa, men ham shunday qilaman, qilmishiga yarasha qaytaraman”, — dema.

³⁰Dangasaning dalasidan, nodonning uzumzori yonidan o‘tdim.

³¹Ana, hamma yoq tikanzor, hamma yerda qichitqi o‘t, tosh devor ham qulab, yer bilan bitta bo‘lib yotibdi.

³²Qarab, o‘ylab ko‘rdim, uni ko‘rib saboq oldim.

³³“Biroz uxlay, bir mizg‘ib olay, yonboshlab birpas dam olay”, — deydi.

³⁴Shuning uchun qashshoqlik yo‘lto‘sarday, muhtojlik esa qaroqchiday ustiga keladi.