Read O‘zbek tilidagi Muqaddas Kitob, 2013 Hikmatlar 25 Bible Online

Hikmatlar 25 - O‘zbek tilidagi Muqaddas Kitob, 2013 bible

Hikmatlar 25

¹Quyidagilar ham Sulaymonning hikmatlaridir. Bu hikmatlar Yahudo shohi Hizqiyoning [1] odamlari tomonidan yozib olingan.

²Sirli qilish — Xudoning shuhrati [2], ishlarni tekshirib bilish esa shoh sharafidir.

³Osmon baland, dengiz chuqur, shohning yuragi ham shunday, uni tushunish qiyin.

⁴Kumushdan chiqindini olib tashla, o‘shanda yaxshi idish qoladi.

⁵Fosiqni shoh oldidan chiqarib tashla, shunda shohning taxti haqiqat bilan mustahkam bo‘ladi.

⁶Shohning oldida o‘zingni yuqori qo‘yma, ulug‘ odamlar turganda to‘riga chiqma.

⁷Chunki o‘zing ko‘rib turgan amirlar oldida birov seni poygakka tushirgandan ko‘ra, “To‘riga o‘ting” degani yaxshiroq.

⁸Shoshilib arz qilma, oxirida qo‘shnilarning oldida uyalib qolsang nima bo‘ladi?

⁹Qo‘shningning o‘zi bilan gaplash, sirni boshqalarga ochma.

¹⁰Bo‘lmasa, eshitganlar seni uyatga qo‘yadi, noming bir umrga yomon bo‘ladi.

¹¹O‘z o‘rnida aytilgan so‘z tilla uzukka qo‘yilgan yoqut ko‘zdaydir.

¹²Dononing tanbehi tinglagan quloqqa tilla sirg‘a va oltin bezakdaydir.

¹³Sadoqatli xabarchi uni yuborganlarga o‘rim paytidagi qordaydir, xo‘jayinining qalbini sevintiradi.

¹⁴Qilmagan sovg‘asi bilan maqtanadigan odam yomg‘irsiz bulut va shamol kabidir.

¹⁵Sabr–toqat bilan gapirilsa amaldor ham ko‘nadi, muloyim so‘z esa toshni ham sindiradi.

¹⁶Asal topsang, yetarlicha yegin, ortiqchasi qayt qildiradi.

¹⁷Qo‘shningnikiga hadeb kiraverma, bo‘lmasa sendan bezib, yomon ko‘rib qoladi.

¹⁸O‘zgaga qarshi soxta guvohlik bergan odam bolta, qilich, o‘tkir o‘qqa o‘xshaydi.

¹⁹Tashvishli kunda vafosizga suyanish, singan tish va cho‘loq oyoqqa ishonish kabidir.

²⁰G‘amgin odam oldida qo‘shiq aytish ayozda ust–boshini yechib tashlaganday, jarohatga sirka surtish kabidir.

²¹Dushmaning och bo‘lsa, ovqat ber, chanqagan bo‘lsa, suv ichir.

²²Shunda uning boshiga yonayotgan cho‘g‘ yiqqanday bo‘lasan, Egamiz esa seni taqdirlaydi.

²³Shimoldan esadigan shamol jala, g‘iybat esa g‘azab keltiradi.

²⁴Keng uyda urishqoq xotin bilan yashashdan ko‘ra, chordoqda yashagan yaxshiroq.

²⁵Uzoq yurtdan kelgan xushxabar charchagan odamga sovuq suv kabidir.

²⁶Fosiqqa bosh eggan solih loyqalangan buloq va buzilgan quduqdaydir.

²⁷Ko‘p asal yeyish yaxshi emas, izzattalab bo‘lish ham hurmat keltirmaydi.

²⁸O‘zini tuta olmaydigan odam devorsiz vayrona shahar kabidir.