Read O‘zbek tilidagi Muqaddas Kitob, 2013 Hikmatlar 26 Bible Online

Hikmatlar 26 - O‘zbek tilidagi Muqaddas Kitob, 2013 bible

Hikmatlar 26

¹Aqlsizga izzat–hurmat ko‘rsatish yozda yoqqan qor, yig‘im–terim paytidagi yomg‘ir kabidir.

²Qushlar bekorga osmonga ko‘tarilmaganday, sababsiz la’nat ham odamga tegmaydi.

³Otga — qamchi, eshakka — suvluq, aqlsizning orqasiga esa — tayoq.

⁴Nodonga nodonligiga yarasha javob berma, bo‘lmasa sen ham unga o‘xshab qolasan.

⁵Nodonga nodonligiga yarasha javob ber, tag‘in o‘zicha dono bo‘lib ketmasin.

⁶Aqlsiz orqali xabar yuborgan odam oyog‘ini kesib tashlaganday azob chekadi.

⁷Ahmoqning og‘zidagi matal cho‘loq oyoqdaydir.

⁸Aqlsizga izzat–hurmat ko‘rsatish palaxmonga tosh bog‘lab qo‘yish kabidir.

⁹Nodonning tilidagi matal mastning qo‘lidagi tikandaydir.

¹⁰Ahmoqni va yo‘ldan o‘tgan har bir mastni yollagan odam to‘g‘ri kelganni otadiganga o‘xshaydi.

¹¹O‘z qusug‘iga qaytib keladigan it kabi, nodon ham o‘z aqlsizligini takrorlaydi.

¹²O‘zini dono deb o‘ylaganni ko‘rganmisan? Undan ko‘ra, aqlsizdan umid ko‘proq.

¹³Dangasa: “Ko‘chada sher bor, u ochiq maydonda yuribdi”, — deydi.

¹⁴Eshik o‘z o‘qida aylanadi, tanbal esa o‘z o‘rnida.

¹⁵Dangasa qo‘lini kosaga cho‘zadi–yu, og‘ziga olib kelishga erinadi.

¹⁶Tanbal o‘z nazarida farosat bilan gapiradigan yetti kishidan ham donoroq.

¹⁷Boshqalarning janjaliga aralashgan daydi itning qulog‘idan cho‘zgandaydir.

¹⁸Telba o‘t, nayza va o‘lim yog‘diradi.

¹⁹Birovni aldab: “Faqat hazillashgan edim” degan ham shunday.

²⁰O‘tin bo‘lmasa, o‘t o‘chib qoladi, chaqimchi bo‘lmasa, janjal to‘xtaydi.

²¹Ko‘mir — cho‘g‘ uchun, o‘tin — olov uchun, urishqoq esa janjal chiqarish uchundir.

²²G‘iybatchining so‘zi — eng shirin ovqat, butun a’zoyi badanga singib ketadi.

²³Shirin so‘zli yomon niyatli odam kumush [1] suvi yuritilgan sopol idish kabidir.

²⁴Dushman tilida boshqacha so‘zlaydi, dilida esa aldashni niyat qiladi.

²⁵U yumshoq so‘zlaganda ishonma, chunki yuragi qabihlikka to‘la.

²⁶Nafrat yolg‘on bilan yashirilgan bo‘lsa ham, yomonligi el–yurtga oshkor bo‘ladi.

²⁷Birovga chuqur qaziganning o‘zi unga tushadi, tosh dumalatganga esa o‘sha tosh qaytadi.

²⁸Yolg‘onchi til o‘zi yaralaganni yomon ko‘radi, xushomadgo‘y esa halokat keltiradi.