Read O‘zbek tilidagi Muqaddas Kitob, 2013 Hikmatlar 27 Bible Online

Hikmatlar 27 - O‘zbek tilidagi Muqaddas Kitob, 2013 bible

Hikmatlar 27

¹Ertangi kun bilan maqtanma, uning nima olib kelishini bilmaysan–ku!

²Seni o‘zing emas, boshqalar, o‘z og‘zing emas, o‘zgalar maqtasin.

³Tosh ham, qum ham og‘ir, aqlsizning g‘azabi esa ikkovidan ham og‘irroq.

⁴Jahl — zolim, g‘azab bir toshqindir, rashk oldida kim bardosh bera oladi?!

⁵Oshkora tanbeh pinhona mehrdan yaxshiroq.

⁶Dushmanning shirin so‘zi emas, do‘stning kaltaklashi sadoqatni ko‘rsatadi.

⁷To‘q odam asalni ham oyoq osti qiladi, ochga esa achchiq narsa ham shirin.

⁸O‘z uyini tashlab ketgan odam inidan ayrilgan qushga o‘xshaydi.

⁹Xushbo‘y moy va muattar atir ko‘ngilni shod qiladi, do‘stning samimiy maslahati esa quvonch keltiradi.

¹⁰O‘z do‘stingni va otangning do‘stini tashlama, og‘ir kunda akangnikiga chopma, yaqin qo‘shni uzoqdagi akadan yaxshiroq.

¹¹Ey, o‘g‘lim [1], dono bo‘l, qalbimni quvontir, shunda birov meni tanqid qilsa ham, javob qaytara olaman.

¹²Es–hushli odam xavf–xatarni ko‘rib yashirinadi, sodda [2] esa to‘xtamasdan boraveradi, shuning uchun qiynaladi.

¹³Begonaga kafillik qilsang, kiyimini yechib ol, chet ellikdan esa garov ol [3].

¹⁴Tong–saharlab do‘stiga hamdu sano aytgan odam unga la’nat o‘qigan bo‘ladi.

¹⁵Janjalkash xotin yomg‘irli kunda to‘xtamay tomayotgan chakkaga o‘xshaydi.

¹⁶Uni boshqarish shamolni boshqarish yoki o‘ng qo‘l bilan moyni ushlash demakdir.

¹⁷Temir temirni o‘tkirlaydi, inson esa do‘stini.

¹⁸Anjirni parvarish qilgan odam uning mevasidan bahramand bo‘ladi, sohibiga yaxshi qaragan esa izzat–hurmatli bo‘ladi.

¹⁹Suv insonning yuzini aks ettirgani kabi, yuragi ham uning ko‘zgusidir.

²⁰O‘lim va Halokat [4] hech to‘ymaganiday, insonning ko‘zi ham aslo to‘ymaydi.

²¹Kumush, oltin olovda sinaladi, odam esa maqtovda.

²²Ahmoqni keliga solib don bilan birga yanchsang ham, ahmoqligi undan ajralmaydi.

²³Qo‘ylaringning ahvolini yaxshi bil, podalaringga yaxshi qara.

²⁴Chunki boylik ham, toj ham abadiy emas.

²⁵O‘tlar qurib, yangi ko‘katlar o‘sib chiqqanda, qir–adirdagi o‘t–o‘lanlar yig‘ib olinganda,

²⁶qo‘zilar kiyim–kechagingni, echkilar esa dala bahosini qoplaydi.

²⁷Echkilarning suti ko‘p, senga ham, uy ahlingga ham, hatto xizmatkorlaringga ham yetarli.