Read O‘zbek tilidagi Muqaddas Kitob, 2013 Hikmatlar 28 Bible Online

Hikmatlar 28 - O‘zbek tilidagi Muqaddas Kitob, 2013 bible

Hikmatlar 28

¹Fosiqni hech kim quvmasa ham qochaveradi, solih esa sherday botir.

²Yurtda isyon bo‘lganda boshliq ko‘payadi, aql–idrokli tufayli esa tinchlik bo‘ladi.

³Ojizlarni ezadigan kambag‘al ovqat qoldirmaydigan seldaydir.

⁴Qonunni tan olmaydiganlar fosiqlarni maqtaydi, qonunga amal qiladiganlar esa ular bilan kurashadi.

⁵Fosiq adolatni tushunmaydi, Egamizga intilgan esa hamma narsani tushunadi.

⁶Kambag‘al bo‘lib to‘g‘ri yurish, boy bo‘lib egri yurgandan yaxshiroq.

⁷Dono farzand [1] qonunga rioya qiladi, yaramasga ulfat bo‘lgan esa otasini sharmanda qiladi.

⁸Sudxo‘r va ochko‘z qashshoqlarga achinadiganga boylik yiqqan bo‘ladi.

⁹Qonundan yuz o‘girganning ibodati ham jirkanchlidir.

¹⁰To‘g‘ri odamni yomon yo‘lga boshlagan odam qazigan chuquriga o‘zi tushadi, pokdil esa yaxshilik topadi.

¹¹Boy o‘zining nazarida dono, aqlli kambag‘al esa o‘zini tekshiradi.

¹²Solih martabaga erishganda katta bayram, fosiq lavozimga kelsa odamlar yashirinadi.

¹³O‘z gunohlarini yashirgan yutuqqa erishmaydi, ularni tan olib, voz kechgan marhamat topadi.

¹⁴Doim Xudodan qo‘rqqan [2] baxtlidir! Bag‘ri tosh odam esa baloga uchraydi.

¹⁵Ojiz xalq ustidagi yovuz hukmdor irillayotgan sher va hujum qilayotgan ayiqdaydir.

¹⁶Aqlsiz hukmdor juda zolim, adolatsiz foydadan nafratlanadigan uzoq yashaydi.

¹⁷Agar birov odam o‘ldirgan bo‘lsa, o‘lguncha qochib yursin, unga hech kim yordam bermasin.

¹⁸To‘g‘ri yuradigan najot topadi, egri yo‘ldan yuradigan esa yiqiladi.

¹⁹O‘z yeriga ishlov berganning noni mo‘l bo‘ladi, orzu–xayollarga berilgan esa qashshoqlikka uchraydi.

²⁰Sodiq barakali bo‘ladi, boyishga shoshilgan jazosiz qolmaydi.

²¹Tarafkashlik yaxshi emas, bir to‘g‘ram non deb odam vafosizlik qiladi.

²²Xasis odam boylik orqasidan quvib, boshiga qashshoqlik kelishini bilmaydi.

²³Tanqid qiladigan odam xushomadgo‘yga qaraganda ko‘proq marhamat topadi.

²⁴Ota–onasining mulkini o‘g‘irlab, “Bu gunoh emas” degan odam buzg‘unchiga sherikdir.

²⁵Ochko‘z janjal chiqaradi, Egamizga ishongan esa to‘q yashaydi.

²⁶O‘zigagina ishongan ahmoqdir, aql bilan yuradigan esa najot topadi.

²⁷Kambag‘alga bergan odam kam bo‘lmaydi, ko‘rib ko‘rmaslikka olgan esa ko‘p la’natga uchraydi.

²⁸Fosiqlar martabaga erishsa odamlar yashirinadi, halokatga yo‘liqqanda esa solihlar ko‘payadi.