Read O‘zbek tilidagi Muqaddas Kitob, 2013 Hikmatlar 29 Bible Online

Hikmatlar 29 - O‘zbek tilidagi Muqaddas Kitob, 2013 bible

Hikmatlar 29

¹Tanbeh olsa ham o‘jarligicha qoladigan odam birdaniga halokatga uchraydi, shifo topmaydi.

²Solihlar ko‘payganda xalq sevinadi, fosiq hukmron bo‘lganda esa fig‘on chekadi.

³Donolikni sevgan o‘g‘il otasini sevintiradi, fohisha bilan aloqada bo‘lgan mol–mulkini barbod qiladi.

⁴Shoh yurtni adolat bilan mustahkamlaydi, sovg‘ani sevadigan esa xarob qiladi.

⁵Do‘stiga xushomad qilgan odam o‘z [1] oyoqlariga tuzoq qo‘yganday bo‘ladi.

⁶Fosiqning gunohi qopqon, solih esa qo‘shiq aytib quvonadi.

⁷Solih ojizning haq–huquqini biladi, fosiqda esa bunday tushuncha ham yo‘q.

⁸Mazax qiluvchilar shaharda to‘polon qiladi, donolar esa g‘azabni tinchlantiradi.

⁹Dono ahmoq bilan sudlashganda, ahmoq achchiqlansa ham, kulsa ham halovat nima bilmaydi.

¹⁰Qonxo‘r pokdil insondan nafratlanadi, to‘g‘rining jonini olmoqchi bo‘ladi [2].

¹¹Nodon bor jahlini to‘kib soladi, dono esa ichida saqlaydi.

¹²Hukmdor yolg‘onga quloq solsa, barcha xizmatkorlari fosiq bo‘ladi.

¹³Zolim bilan ojizning bir o‘xshashligi bor: ikkoviga ham Egamiz ko‘z nuri bergan.

¹⁴Shoh kambag‘alni adolat bilan hukm qilsa, uning taxti abadiy mustahkam turadi.

¹⁵Qamchi bilan nasihat aql beradi, o‘z holiga tashlab qo‘yilgan bola esa onasiga uyat keltiradi.

¹⁶Fosiq ko‘payganda gunoh ham ko‘payadi, solih esa fosiqning halokatini ko‘radi.

¹⁷Farzandingga [3] tarbiya ber: u senga orom beradi, qalbingni shodlikka to‘ldiradi.

¹⁸Vahiy bo‘lmasa el–yurt yo‘ldan ozadi, Xudoning qonuniga amal qilgan baxtlidir!

¹⁹Qul faqat so‘z bilan tarbiyalanmaydi, so‘zni tushunsa ham amal qilmaydi.

²⁰Shoshilib gapiradiganni ko‘rganmisan? Undan ko‘ra, nodonda umid ko‘proq.

²¹Qulni yoshligidan erkalatib o‘stirsa, oqibatda xo‘jayiniga qayg‘u bo‘ladi [4].

²²Serjahl odam janjal chiqaradi, serzarda esa ko‘p gunoh qiladi.

²³Odamning mag‘rurligi uni past qiladi, kamtarin esa izzat–hurmat topadi.

²⁴O‘g‘riga sherik bo‘lgan o‘z jonini yomon ko‘radi, u tanbeh eshitsa ham churq etmaydi.

²⁵Odamdan qo‘rqish tuzoqqa ilintiradi, Egamizga umid bog‘lagan esa xavf–xatardan xoli bo‘ladi.

²⁶Hukmdor marhamatini qidirgan ko‘p, lekin insonni hukm qiladigan Egamizdir.

²⁷Fosiq solihga jirkanch, to‘g‘ri yuradigan esa fosiqqa jirkanchdir.