Read O‘zbek tilidagi Muqaddas Kitob, 2013 Hikmatlar 3 Bible Online

Hikmatlar 3 - O‘zbek tilidagi Muqaddas Kitob, 2013 bible

Hikmatlar 3

¹O‘g‘lim [1], so‘zlarimni unutma, amrlarimni yuragingda saqla.

²Ular umringga umr qo‘shadi, hayoting tinch bo‘ladi.

³Abadiy sevgini aslo tark etma. Bo‘yningga marjon qilib taqib ol, yuraging qa’riga yozib qo‘y.

⁴Shunda Xudoning ham, odamlarning ham mehrini qozonasan, Ulardan izzat–hurmat topasan.

⁵O‘z aql–idrokingga suyanma, butun qalbing bilan Egamizga ishon.

⁶Har ishingda Egamizni e’tirof et, shunda U yo‘llaringni to‘g‘rilaydi [2].

⁷O‘zingni dono hisoblama. Egamizdan qo‘rq [3]. Yomonlikdan yuz o‘girgin.

⁸Shunday qilsang jisming sog‘, joning esa omon bo‘ladi.

⁹O‘z boyliging, birinchi hosiling bilan Egamizni ulug‘la.

¹⁰Shunda omboring to‘lib–toshadi, yangi sharobing yetib ortadi.

¹¹O‘g‘lim, Egamizning tarbiyasini rad qilmagin, Uning tanbehidan ruhing tushib ketmasin.

¹²Ota yaxshi ko‘rgan farzandini [4] jazolagandek, Xudo [5] ham sevganini jazolaydi [6].

¹³Donolikka erishgan, aql–idrok topgan qanday baxtlidir!

¹⁴Chunki uning nafi kumushdan, foydasi esa oltindan ham afzalroqdir.

¹⁵U javohirlardan ham azizdir, sen tilagan biror narsa Unga teng kelmaydi.

¹⁶Uning o‘ng qo‘lida uzoq umr, chap qo‘lida esa boylik va shon–shuhrat bor.

¹⁷Yo‘li — shodlik yo‘li, barcha so‘qmoqlari tinchdir.

¹⁸Donolik uni ushlab turganlar uchun hayot daraxti kabidir, Uni asraganlar esa baxtlidir.

¹⁹Egamiz donolik bilan yerni yaratdi, aql–idroki bilan osmonni o‘z o‘rniga joylashtirdi.

²⁰Uning aqli bilan chuqurliklar bo‘lingan, bulutlardan shudring tushgan.

²¹O‘g‘lim, donolik va fahm–farosatni mahkam ushla, nazaringdan qochirmagin.

²²O‘shanda ular joningga hayot baxsh etadi, bo‘yningga bezakday bo‘ladi.

²³Yo‘lingda eson–omon yurasan, oyog‘ing esa qoqilmaydi.

²⁴Bexavotir yotasan, uyqung shirin bo‘ladi.

²⁵Bexosdan keladigan ofatdan qo‘rqma. Yovuz hujum qilganda ham qo‘rqma.

²⁶Chunki Egamiz yoningda bo‘ladi, seni qoqilishdan asraydi.

²⁷Yaxshilik qilish qo‘lingdan kelsa, muhtojlardan yordamingni ayama.

²⁸O‘zingda bor bo‘lsa, qo‘shningga “kechroq kel”, “ertaga beraman”, deb aytma.

²⁹Senga ishonib, yoningda tinchgina yashayotgan qo‘shningga qarshi yomon niyat qilma.

³⁰Senga yomonlik qilmagan odam bilan sababsiz urishma.

³¹Zo‘ravonga hasad qilma, u qiladigan ishlarni qilma.

³²Chunki Egamizga yovuzlar jirkanchdir, U to‘g‘ri odamga yaqin bo‘ladi.

³³Fosiqning uyi Egamizning la’natiga, solihning uyi esa qut–barakaga to‘ladi.

³⁴U mazax qiluvchilarni mazax qiladi, kamtarga esa inoyat qiladi.

³⁵Donolar shon–shuhratga erishadilar, nodonlar esa sharmandalikka duchor bo‘ladilar.